Իրանական պատմաբանասիրություն

Արևելագիտության ֆակուլտետի իրանագիտության ամբիոնի մագիստրոսական կրթությունն իրականացվում է «Իրանական պատմաբանասիրություն» կրթական ծրագրով:

Ընդունելության պահանջները

«Արևելագիտություն» մասնագիտության գծով բակալավրի դիպլոմ ունեցող անձինք մագիստրատուրա են ընդունվում ԵՊՀ-ում գործող կարգի համաձայն՝ մրցութային կարգով: Այլ մասնագիտությունների գծով բակալավրի դիպլոմ ունեցող անձինք հնարավորություն ունեն մասնակցելու մագիստրատուրայի մրցույթին տվյալ մասնագիտության բակալավրի պետական քննական ծրագրին համապատասխանող քննությունը հանձնելուց հետո։ Օտարերկրյա բուհերի շրջանավարտների ընդունելությունը մագիստրատուրա կատարվում է հարցազրույցի և համապատասխան ֆակուլտետի հանձնաժողովի կարծիքի հիման վրա։

«Իրանական պատմաբանասիրություն» ծրագրի հարցաշարը՝ «Ընդունելություն» բաժնում։

Ծրագրի նպատակը

Ստանալով բարձրագույն մասնագիտական կրթություն՝ ուսանողները ձեռք են բերում անհրաժեշտ գիտելիքներ և գործնական հմտություններ՝ աշխատաշուկայում պահանջված ու մրցունակ մասնագետ լինելու համար: «Իրանական պատմաբանասիրություն» կրթական ծրագրում ուսանողները սովորում են 2 տարի՝ ստանալով ինչպես ընդհանուր, այնպես էլ մասնագիտական և նեղ մասնագիտական գիտելիքներ:

«Իրանական պատմաբանասիրություն» մագիստրոսական ծրագրի ավարտին շրջանավարտները տիրապետում են իրանական լեզուներին առնչվող հետազոտական և գործնական աշխատանքի հմտություններին, պատկերացնում և կարողանում են վերլուծել Իրանի և տարածաշրջանի երկրների միջև քաղաքական և մշակութային հարաբերությունների ողջ համակարգը։ Ծրագիրն ուսանողներին հնարավորություն է տալիս զարգացնելու և խորացնելու իրանագիտության ոլորտում ձեռք բերած տեսական գիտելիքները և գործնական հմտությունները, պատրաստում է իրանագետ-մասնագետներ գիտական, կրթական, մշակութային, քաղաքական, տնտեսական և հատկապես միջպետական հարաբերությունների ոլորտներում դիվանագիտական, թարգմանական, վերլուծական, խորհրդատվական աշխատանք կատարելու համար, ինչպես նաև խթանում է ուսանողների քննադատական մտածողությունը, խրախուսում նրանց ինքնուրույն աշխատանքը, օգնում կիրառել մասնագիտական կարողությունները գործնական դաշտում։

Առավելությունները

Արևելագիտության ֆակուլտետի «Իրանական պատմաբանասիրություն» կրթական ծրագիրը իրանագիտական դպրոցի ամենապահանջված կրթական ծրագիրն է: Այն բաղկացած է ընդհանուր, մասնագիտական պարտադիր և կամընտրական դասընթացներից: Մասնագիտական պարտադիր և կամընտրական դասընթացների բովանդակությունը վերաբերում է տարածաշրջանային արդի հիմնախնդիրների վերլուծության, իրանագիտության, լեզվաբանության և մշակութաբանության հիմնահարցերին: Շրջանավարտը հնարավորություն ունի կրթությունը շարունակելու կրթության հաջորդ մակարդակում հասարակական և հումանիտար գիտությունների ոլորտում:

Կարիերայի հնարավորությունները

Արևելագիտության ֆակուլտետի ուսանողները դառնում են տեղական և միջազգային շուկայի պահանջներին համապատասխանող մասնագետներ, որոնք հնարավորություն են ունենում աշխատելու թե՛ պետական, թե՛ մասնավոր կառույցներում։ Արևելագետները պահանջված են ՀՀ նախագահի աշխատակազմում, ՀՀ արտաքին գործերի նախարարությունում, պաշտպանության նախարարությունում, ՀՀ ազգային անվտանգության ծառայությունում, այլ պետական մարմինների տեղեկատվավերլուծական և արտաքին կապերի ստորաբաժանումներում, քաղաքագիտական, տնտեսական և մշակութաբանական հետազոտություններ կատարող ոչ պետական կազմակերպություններում և լրատվամիջոցներում, ինչպես նաև զբոսաշրջային գործունեություն ծավալող, արտահանմամբ և ներկրմամբ զբաղվող մասնավոր ընկերություններում։ Շրջանավարտների մի մասը հնարավորություն ունի գիտակրթական գործունեություն ծավալելու ՀՀ այնպիսի կարևոր գիտական կենտրոններում, ինչպիսիք են ՀՀ գիտությունների ազգային ակադեմիան, Մ. Մաշտոցի անվան Մատենադարանը, Երևանի պետական համալսարանը և պետական ու մասնավոր այլ բուհեր, գիտահետազոտական ինստիտուտներ: