Երևանի պետական համալսարանը, «Արմենիա Վայն» ընկերությունը և «Հայաստանի գինու պատմության թանգարան» հիմնադրամը համագործակցության հուշագիր են կնքել՝ նպատակ ունենալով միավորելու ջանքերը գիտակրթական ծրագրերի իրականացման և հայոց նյութական ու ոչ նյութական մշակութային ժառանգության հանրայնացման համար։
Համագործակցությունը նոր հնարավորություններ կստեղծի Պատմության ֆակուլտետի ուսանողների համար՝ ներգրավվելու գիտական նախագծերում և ուսումնասիրելու գինեգործության պատմությունը։ Հուշագրով ամրագրված դրույթների համաձայն՝ բակալավրիատի, մագիստրատուրայի ուսանողների և ասպիրանտների համար նախատեսվում է կազմակերպել դասախոսություններ, սեմինար-քննարկումներ, գիտական հետազոտություններ և վերլուծություններ պատմագիտության, ազգագրության, հնագիտության և հարակից ոլորտներում։
Պատմության ֆակուլտետի դեկան Մխիթար Գաբրիելյանը նշեց, որ «Արմենիա Վայն» ընկերության և «Հայաստանի գինու պատմության թանգարան» հիմնադրամի հետ հնարավոր է բազմակողմ ծավալել համագործակցություն։
«Պատմության ֆակուլտետի համար այս համագործակցությունը մեծ արժեք ունի, քանի որ գինու մշակույթի շուրջ ձևավորված նարատիվը գիտական հետազոտությունների հետաքրքիր ուղղություն է։ Ուսանողներին կարելի է ներգրավել հետազոտական աշխատանքներում, որոնք ոչ միայն կանդրադառնան գինեգործության պատմությանը, այլև կվերլուծեն գինու մշակույթը ավելի լայն համատեքստում։ Մեր գործընկերները պատրաստակամ են ֆակուլտետին տրամադրելու հարթակներ գիտական տարբեր միջոցառումների կազմակերպման, պրակտիկաների անցկացման և ուսանողների տեսական գիտելիքների խորացման համար»,- ընդգծեց դեկանը։

«Հայաստանի գինու պատմության թանգարան» հիմնադրամի տնօրեն Հայկ Գյուլամիրյանի խոսքով՝ 2021 թվականից թանգարանը պաշտոնապես գործում է՝ համատեղելով ցուցադրություններն ու գիտական գործունեությունը՝ գինեգործության ոլորտը միջազգային հարթակ դուրս բերելու նպատակով։ Հ․ Գյուլամիրյանը նշեց, որ թանգարանը նպատակ ունի զարգացնելու հրապարակումները խաղողագործության և գինեգործության պատմությունը գիտական շրջանառության մեջ դնելու համար, որտեղ ակտիվ մասնակցություն կարող են ունենալ նաև Պատմության ֆակուլտետի ուսանողները։
Հ․ Գյուլամիրյանն ասաց, որ թանգարանի հավաքածուի զգալի մասը դեռևս չի հրատարակվել, և անհրաժեշտ է կազմել կատալոգ, որը կարող է կյանքի կոչվել ուսանողների խմբի և գիտական ինստիտուտների համատեղ աշխատանքի արդյունքում։
Կողմերը նախատեսում են գործակցության շրջանակում իրականացնել տարբեր ծրագրեր և նախաձեռնություններ՝ միտված համատեղ նպատակների իրագործմանը։