ԵՊՀ պատմության ֆակուլտետի «Պատմություն» մասնագիտության 3-րդ կուրսի ուսանողները «Իրանի և Թուրքիայի պատմության» դասընթացի շրջանակում արտալսարանային դաս անցկացրին Հայոց ցեղասպանության թանգարան-ինստիտուտում։ «Հայերը Օսմանյան կայսրությունում 20-րդ դարի սկզբին» թեմայով դասի նպատակն էր ուսանողներին հնարավորություն տալ տեղում ծանոթանալու հայոց ցեղասպանության պատմությանը, ուսումնասիրելու արխիվային նյութեր և թանգարանի ցուցանմուշներ։

Այցի ընթացքում ուսանողներին ներկայացվեցին թանգարանի հիմնական ցուցասրահներում տեղ գտած ցեղասպանության փաստաթղթերը, վավերագրական լուսանկարները, զոհերի անձնական իրերը և պատմական քարտեզները։
Դասը վարում էր ԵՊՀ Հայաստանի հարակից երկրների ամբիոնի դոցենտ, պատմական գիտությունների թեկնածու Քրիստինե Մելքոնյանը։ Խոսելով արտալսարանային դասի շրջանակում ձեռք բերված գիտելիքների մասին՝ նա նշեց. «Օսմանյան կայսրությունում մինչև ցեղասպանությունը և ցեղասպանության տարիներին արևմտահայերի կյանքին, տեղահանություններին և կոտորածներին ուսանողները ծանոթացել են ցուցադրվող ֆոտոնյութերի, փաստաթղթերի և այլ վավերագրերի միջոցով, ինչը նրանց հնարավորություն է տալիս խորապես ուսումնասիրելու 1915 թվականի ողբերգական իրադարձությունները, դրանց նախադրյալներն ու հետևանքները»։
Ք. Մելքոնյանն ընդգծեց արտալսարանային դասընթացների անցկացման կարևորությունն ուսանողների հետազոտական կարողությունների զարգացման տեսանկյունից․ «Արտալսարանային դասն ուսանողի մոտ զարգացնում է հետազոտական հմտություններ՝ քննադատական, վերլուծական, հետազոտական, ստեղծագործական մտածողություն։ Բացի դրանից՝ անհրաժեշտ է հաշվի առնել այն փաստը, որ Հայոց ցեղասպանության թանգարան-ինստիտուտը գիտահետազոտական կենտրոն է, որտեղ ուսումնասիրվում է Օսմանյան կայսրությունում իրագործված հայոց ցեղասպանության պատմությունը։ Ուսանողները, այցելելով թանգարան, ծանոթանում են դրա կառուցվածքին, հիմնական գործառույթներին, հավաքածուների բնույթին և աշխատանքներին։ Թանգարանը նրանց հնարավորություն է տալիս հետազոտական աշխատանքներ իրականացնելու ժամանակ գիտաշխատողների մասնագիտական խորհրդատվությամբ և աջակցությամբ օգտվելու թանգարան-ինստիտուտի ֆոնդերում պահվող նյութերից։ Արդյունքում ուսանողները ձեռք են բերում սկզբնաղբյուրների հետ աշխատելու հմտություններ և կարողանում են դրանք արդյունավետորեն կիրառել իրենց հետազոտություններում»։
Հավելենք, որ Պատմության ֆակուլտետում կարևորվում են արտալսարանային դասերը, որոնք անցկացվում են թանգարաններում, գիտահետազոտական կենտրոններում և հնավայրերում՝ նպաստելով ստացած տեսական գիտելիքների ամրապնդմանը։