Մշակութաբանություն

Ընդունելության պահանջները

«Մշակութաբանություն» մասնագիտության շրջանակում մագիստրատուրայի ընդունելությունն անցկացվում է առանց քննությունների, իսկ հարակից մասնագիտություններ ունեցող դիմորդները հանձնում են համապատասխան մասնագիտության բանավոր քննությունը։

Ծրագրի նպատակը

Ծրագրի նպատակն է ուսանողներին տրամադրել մշակութային ժառանգության վերաբերյալ միջազգային և հայրենական գիտական մոտեցումների իմացություն, ձևավորել հայ մշակութային ժառանգության էական դրսևորումներն ինքնուրույն նկարագրելու և ներկայացնելու կարողություն, պատմամշակութային հարցերն ազգային ինքնության համատեքստում դիտարկելու հմտություն, ինքնության արդիական խնդիրների իմացություն, պատշաճ մակարդակով մասնագիտական զեկուցում պատրաստելու և գիտաժողովներին մասնակցելու հմտություն:

Առավելությունները

Ծրագրի բարեհաջող ավարտին շրջանավարտներն ունակ կլինեն կազմելու մշակութաբանական հետազոտության ծրագրեր, մշակելու մշակույթի տարբեր ոլորտների վերաբերյալ հավաքած տեղեկատվություն:

Կարիերայի հնարավորությունները

«Մշակութաբանություն» մագիստրոսական ծրագրի շրջանավարտները կարող են աշխատանքի անցնել մշակույթի ուսումնասիրության, կառավարման, մշակութային կյանքի կազմակերպման, մշակութային բիզնեսին առնչվող հաստատություններում՝ գիտահետազոտական հիմնարկներ, թանգարաններ, միջին մասնագիտական և բարձրագույն ուսումնական հաստատություններ, մշակույթի կառավարմամբ, մշակութային կյանքի կազմակերպմամբ, մշակութային բիզնեսով զբաղվող հիմնարկներ (ԿԳՄՍ նախարարության համապատասխան ստորաբաժանումներ, մշակույթի մարզային և քաղաքային բաժիններ, մշակույթի տներ, տուրիստական գործակալություններ և այլն):

Ծրագրի շրջանավարտները կարող են շարունակել իրենց ուսումը ԵՊՀ մշակութաբանության ամբիոնի, հայագիտական այլ ամբիոնների, ՀՀ ԳԱԱ հնագիտության և ազգագրության ինստիտուտի, ՀՀ ԳԱԱ հայագիտական ու մշակութային հետազոտություններին առնչվող ինստիտուտների ասպիրանտուրայում: