Կլինիկական հոգեբանություն և հոգեթերապիա

Ընդունելության պահանջները

Մագիտրոսական ծրագրի ուսուցման ձևը առկա է, տևողությունը՝ 2 տարի, ուսման վարձը տարեկան 800 000 ՀՀ դրամ է։ Կրթական ծրագրի ավարտին ուսանողին շնորհվում է հոգեբանության մագիստրոսի որակավորում՝ կլինիկական հոգեբանություն և հոգեթերապիա մասնագիտացմամբ։

ԵՊՀ մագիստրատուրայի 2024/2025 ուսումնական տարվա առկա ուսուցման ձևերով ընդունելությանը հնարավորություն ունեն դիմելու ՀՀ պետական և ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական այլ բուհերի՝ բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

ԵՊՀ մագիստրատուրայի 2024/2025 ուսումնական տարվա առկա ուսուցման ձևերով ընդունելությունը կատարվելու է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Ծրագրի նպատակները

Ծրագիրը նպատակ ունի զարգացնելու ուսանողների մասնագիտական կարողությունները՝ կլինիկական հոգեբանության և հոգեթերապիայի տեսական և գործնական հիմնախնդիրները հասկանալու, մեկնաբանելու և վերլուծելու համար, տրամադրելու ուսանողներին հիմնարար գիտելիքներ հոգեթերապիայի տարբեր ուղղությունների գաղափարական հիմքերի, հիմնադրույթների, մեթոդների վերաբերյալ, ուսանողներին ունակ դարձնելու կիրառելու հոգեթերապևտիկ տարբեր ուղղությունների մեթոդները հոգեկան գործունեության տարբեր խանգարումներով այցելուների հետ աշխատանքում:

Առավելությունները

Մագիստրոսական ծրագրի հաջող ավարտին (որպես մասնագիտական գիտելիք և իմացություն) ուսանողն ունակ կլինի նկարագրելու հոգեկան առողջության չափանիշները, «DSM-V»-ի և «ICD-11»-ի հիվանդությունների դասակարգումները և կլինիկական հոգեախտորոշման մեթոդները, սահմանելու անձի պաթոլոգիայի նևրոտիկ և փսիխոտիկ մակարդակները, մեկնաբանելու հոգեթերապիայի տարբեր ուղղությունների գաղափարական հիմքերը, հիմնադրույթները, մեթոդների նկարագրությունները, մեկնաբանելու հոգեվերլուծության և հոգեբանության գիտելիքները, բացատրելու նեյրոհոգեբանության մեխանիզմները, ախտորոշման յուրահատկությունները, օրգանական համախտանիշների օրինաչափությունները, ներկայացնելու անձի ժամանակակից կոնցեպցիաները:

Ուսանողն ունակ կլինի (որպես գործնական մասնագիտական կարողություն) կիրառելու կլինիկական թեստեր և ախտորոշելու անձի ախտաբանությունը, կատարելու հոգեկան ֆունկցիաների փորձագիտական գնահատում, բացահայտելու հիվանդի հոգեբանական վիճակը և լրացնելու հիվանդության պատմության համապատասխան հատվածը, կատարելու այցելուների խորհրդատվություն հոգեախտորոշման հիման վրա, տիրապետելու հաղորդակցման յուրահատկություններին հոգեկան տարբեր խանգարումների դեպքում, գործնականորեն պահպանելու հոգեկան տարբեր խանգարում ունեցող մարդկանց հետ աշխատանքի դեոնթոլոգիական սկզբունքները:

Ուսանողն ունակ կլինի (որպես ընդհանրական (փոխանցելի) կարողություն) օգտվելու կլինիկական հոգեբանության և հոգեթերապիայի տարատեսակ աղբյուրներից (համացանցային ռեսուրսներ, էլեկտրոնային գրադարաններ, մասնագիտական գրքեր և գիտական հոդվածներ), վերլուծելու բժշկական հոգեբանության և հոգեթերապիայի առկա հիմնախնդիրները և գնահատելու դրանց լուծման հնարավոր եղանակները, ինքնուրույն պլանավորելու և կատարելու կլինիկական հոգեբանության և հոգեթերապիայի ոլորտում գիտահետազոտական աշխատանք՝ առաջադրելով նպատակը, խնդիրները, օբյեկտը, առարկան, վարկածը և այլն, պատրաստելու զեկուցումներ, վերլուծելու և ներկայացնելու հետազոտությունների արդյունքները, վարելու գիտական բանավեճեր:

Կարիերայի հնարավորությունները

Ծրագրի շրջանավարտները կարող են շարունակել իրենց ուսումը ԵՊՀ փիլիսոփայության և հոգեբանության ֆակուլտետի ասպիրանտուրայում։

«Կլինիկական հոգեբանություն և հոգեթերապիա» ծրագրի շրջանավարտները հնարավորություն ունեն  աշխատանքի անցնելու որպես կլինիկական հոգեբան, հոգեթերապևտ, հոգեկարգավորող, հոգեբան-խորհրդատու։

Կրթական ծրագրի շրջանավարտները հնարավորություն ունեն աշխատելու հետևյալ հաստատություններում՝ Երևանի և մարզերի հոգեբանական կենտրոններ, հոգեբուժարաններ, տարբեր պրոֆիլի հիվանդանոցներ, փորձաքննությունների ազգային բյուրո, քրեակատարողական հիմնարկներ, դպրոցներ ու մանկական զարգացման կենտրոններ, ընտանեկան բռնության և խոշտանգումների դեմ պայքարող կազմակերպություններ, ՀՀ արտակարգ իրավիճակների նախարարություն, Հայկական Կարմիր խաչ, միջազգային կազմակերպություններ (օր․՝ «Save the children», «Բժիշկներ առանց սահմանների», ՄԱԿ, «World Vision Armenia», «Սոմնուս» քնի խանգարումների կարգավորման նյարդաբանական կլինիկա, «Առաքելություն Հայաստան», «Հերոսների քաղաք»):