Բարոյագիտություն

Ծրագիրը բաղկացած է ընդհանուր և մասնագիտական (պարտադիր և կամընտրական) դասընթացներից, և հետազոտական կառուցամասից։

«Բարոյագիտություն» մագիստրոսական ծրագրի ուսուցման ձևը առկա է՝ երկու տարի տևողությամբ։ Կրթական ծրագրի ավարտին ուսանողը կստանա «Փիլիսոփայության» մագիստրոսի որակավորում։ Ուսման վարձը՝ 500․000 ՀՀ դրամ։

Ընդունելության պահանջները

Քննության անցկացման ձևաչափը՝ բանավոր։

Ծրագրի նպատակը

Ծրագիրը նպատակն է պատրաստել կրթության, գիտության և քաղաքացիական հասարակության կառույցներում փիլիսոփայության և բարոյագիտության մասնագետներ, որոնք ունակ կլինեն վերլուծելու և  համակարգելու ժամանակակից քաղաքակրթական մարտահրավերների աշխարհայացքային, սոցիալ-փիլիսոփայական և բարոյական հիմնախնդիրները, կանխատեսելու սոցիոմշակութային և բարոյական շարժառիթներ ունեցող ճգնաժամային երևույթները և մշակելու դրանց հաղթահարման հայեցակարգեր, մշակելու սոցիալ-տնտեսական, քաղաքական և քաղաքացիական կյանքի բարոյական կարգավորման ծրագրեր և ներդրման մեխանիզմներ, դասավանդելու կրթական համակարգերում, աշխատելու կրթական ծրագրեր իրականացնող միջազգային կազմակերպություններում, վերլուծական կենտրոններում և հասարակական  կազմակերպություններում։

Առավելությունները

Մագիստրոսական ծրագրի ուսանողներն անցնում են գիտահետազոտական և գիտամանկավարժական բնույթի պրակտիկա՝ լայն հնարավորություն ստանալով ձեռք բերելու համապատասխան գիտելիքներ և մարզելու իրենց մասնագիտական հմտություններն ու կարողությունները: 

Պրակտիկան անցկացվում է փիլիսոփայության և հոգեբանության ֆակուլտետում, որակավորման բարձրացման դասընթացների շրջանակում, կրթական այլ հաստատություններում, հետազոտական կենտրոններում,  երիտասարդության բարոյական դաստիարակության խնդիրներով զբաղվող հասարակական կազմակերպություններում և կենտրոններում (ԵՊՀ սոցիալական փիլիսոփայության, բարոյագիտության և գեղագիտության ամբիոն, «Միջմշակութային հետազոտություն և զարգացում»  ՀԿ, «Նորարարական կրթական լուծումների լաբորատորիա» ՀԿ)։

Շրջանավարտների կարիերայի հնարավորությունները

Ծրագրի շրջանավարտները կարող են շարունակել իրենց ուսումը ԵՊՀ փիլիսոփայության և հոգեբանության ֆակուլտետի ասպիրանտուրայում և աշխատել գիտահետազոտական կենտրոններում: