Հանրային քաղաքականություն և կառավարում

«Հանրային քաղաքականություն և կառավարում» (շնորհվող որակավորումը` կառավարման բակալավր) կրթական ծրագիրը գործարկվում է ԵՊՀ-ում 2022/2023 ուսումնական տարվանից:

Առաջարկվող բակալավրի կրթական ծրագիրը մշակվել է Արիզոնայի պետական համալսարանի հետ համատեղ: Ծրագրի նորարարական կողմերից մեկը ուսումնական պլանում տնտեսական բաղադրիչ պարունակող դասընթացների գերակայությունն է, ինչն առանցքային նշանակություն ունի ոլորտի ապագա մասնագետների պատրաստման համար:

Ընդունելության պահանջները

Ընդունելությունն անցկացվում է «Հայոց լեզու և գրականություն» («Օտար լեզու»), «Հայոց պատմություն» առարկաներից կենտրոնացված ընդունելության քննությունների արդյունքներով: Ընդունելության քննություններին կարող են մասնակցել միջնակարգ և միջին մասնագիտական կրթություն ունեցող դիմորդները:

Ծրագրի նպատակը

Կրթական ծրագրի նպատակն է ուսանողների մոտ ձևավորել մասնագիտական կարողությունների, գիտելիքների և հմտությունների անհրաժեշտ համադրույթը՝ հանրային քաղաքականության ձևակերպման, մշակման և իրականացման, հանրային մենեջմենթի, պետական և ոչ պետական, այդ թվում` երրորդ հատվածի կարգավորման և կառավարման ոլորտները համալրելու, ինչպես նաև վարչաքաղաքական կառույցների, կառավարման տարբեր համակարգերի գործունեության առաջնահերթությունների մշակման և գործառույթների իրականացման համար, նպաստել ուսանողների շրջանում քննադատական մտածողության, տեսական և էմպիրիկ գիտելիքների համադրման ու գնահատելու ունակությունների ձևավորմանը: Ծրագրի շրջանակում ուսանողներն ստանում են այնպիսի գիտելիքներ և կարողություններ, որոնք հնարավորություն կընձեռեն նրանց աշխատելու հանրային քաղաքականության իրականացման բնագավառում` հանրային քաղաքականության բնագավառում մշակված նախագծերի, ծրագրերի իրագործման գործընթացներում: Ծրագրի ռազմավարական առաջնահերթությունն է տեսական գիտելիքների հետ մեկտեղ ուսանողների մոտ ձևավորել վերլուծական աշխատանքի անհրաժեշտ հմտություններ` ներառյալ տարբեր գիտակարգերի վերլուծական հասկացութային շրջանակները և գործիքակազմը:

Առավելությունները

Կրթական ծրագիրը մշակելիս օգտագործվել են հետևյալ կրթական չափորոշիչները և (կամ) ծրագրային կողմնորոշիչները՝ հանրային կյանքի տարբեր ոլորտներում կարգավորման և պլանավորման հիմնախնդիրների առկայությունը կրթական ծրագրում, վերլուծական բաղադրիչ ուսումնական ծրագրերում, միջգիտակարգային մոտեցումների առկայություն` համադրելով կառավարման տնտեսագիտության, քաղաքագիտության, հանրային կառավարման, իրավունքի, սոցիոլոգիայի, ինչպես նաև տեղեկատվական տեխնոլոգիաների վերլուծական գործիքակազմը և առկա հետազոտական մոդելները: Որպես ծրագրային չափորոշիչ հիմք է ընդունվել ՈԱՇ-ը, ինչպես նաև ԵՊՀ այլ ուղենիշներ:

Կարիերայի հնարավորությունները

Կրթական ծրագրի շրջանակում կառավարման բակալավրի որակավորում ստացած մասնագետները կարող են աշխատանքի անցնել հանրային քաղաքականության մշակման, իրականացման, վերլուծության և գնահատման բնագավառներում, ինչպես նաև հանրային հատվածի (այդ թվում` հանրային-մասնավոր համագործակցության ձևաչափում) տարբեր մակարդակներում, մասնավորապես կառավարության կենտրոնական ապարատում, միջգերատեսչական համակարգման գործառույթներ իրականացնող պետական մարմիններում (հանձնաժողովներ, գործակալություններ), կառավարության կառուցվածքային ստորաբաժանումների, առաջին հերթին, նախարարությունների ոլորտային (պրոֆիլային) վարչություններում (քաղաքականության կամ ծրագրերի պատրաստում, մշտադիտարկում, տվյալների բազաների հետ աշխատանք), ոչ պետական (հասարակական) հատվածի կարգավորման և կառավարման ոլորտներ, խոշոր և միջին պետական (հանրային) ձեռնարկություններ: