ԵՊՀ տնտեսագիտության և կառավարման ֆակուլտետի և «Քեյ Փի Էմ Ջի Արմենիա» (KPMG Armenia) ընկերության համագործակցության շրջանակում ընկերության ՄՌԿ բաժնի ղեկավար Սոնա Մարտիրոսյանը և խորհրդատվական ծառայությունների բաժնի փոխտնօրեն Սիրանուշ Աղեկյանը հանդիպում ունեցան ֆակուլտետի դեկան, դոցենտ Կառլեն Խաչատրյանի և դեկանի տեղակալ, դոցենտ Վարդան Ալեքսանյանի հետ։
Քննարկումը ծավալվեց բուհ-գործատու համագործակցության ընդլայնման հնարավորությունների բացահայտման և աշխատաշուկայի արդի մարտահրավերների հաղթահարման շուրջ: Առանցքում ուսանողների պրակտիկայի կազմակերպման, հետազոտական համատեղ նախագծերի իրականացման հարցերն էին՝ ուսանողների մուտքը դեպի աշխատաշուկա ավելի լավ նախապատրաստելու համար:
Հանդիպումից հետո Սիրանուշ Աղեկյանը ուսանողների համար անցկացրեց բաց դասախոսություն կորպորատիվ ֆինանսներին առնչվող թեմայով՝ շեշտադրելով ռիսկերի կառավարման հիմնահարցերը: Դասախոսության շրջանակում ներկայացվեցին ռիսկերի հիմնական տեսակները, վերջիններիս գնահատման և նվազեցման ժամանակակից մեթոդները: Ակտիվ քննարկում ծավալվեց Հայաստանում կորպորատիվ ֆինանսների ոլորտի մարտահրավերների շուրջ:
Դասախոսությունն անցկացվեց ինտերակտիվ ձևաչափով: Ուսանողները ընկերության ներկայացուցիչներին ուղղեցին իրենց հետաքրքրող բազմաթիվ հարցեր, որոնք վերաբերում էին «Քեյ Փի Էմ Ջի Արմենիա»-ում աշխատանքի անցնելու և թեկնածուների ընտրության գործընթացին, ֆինանսների ոլորտում կարիերայի կառուցման հնարավորություններին և մասնագիտական աճի հեռանկարներին:
Կարևորելով ակադեմիական և բիզնես համայնքների համագործակցությունը աշխատաշուկայի նոր մարտահրավերներին դիմակայելու և որակյալ մասնագետների նոր սերնդի ձևավորման համար՝ ԵՊՀ տնտեսագիտության և կառավարման ֆակուլտետը խրախուսում է այսօրինակ հանդիպում-քննարկումների անցկացումը:
