ԵՊՀ «Տվյալների գիտությունը բիզնեսում» մագիստրոսական ծրագրի և Սան Խոսեի պետական համալսարանի (ԱՄՆ) DA ծրագրի համագործակցությունը
2018 թվականից «Ձեռնարկությունների ինկուբատոր» հիմնադրամի (EIF) և Ինովացիոն լուծումների և տեխնոլոգիաների կենտրոնի (ISTC) աջակցութամբ մեկնարկեց ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» և Սան Խոսեի պետական համալսարանի (ԱՄՆ) «Տվյալների անալիտիկա» մագիստրոսական ծրագրերի միջև համագործակցությունը։
Այդ նախաձեռնության առաջին արդյունքն այն էր, որ 2019 թ. մայիսին ԵՊՀ «Տվյալների գիտությունը բիզնեսում» մագիստրոսական ծրագրի մի խումբ ուսանողներ և դասախոսներ մեկնեցին Սան Խոսեի պետական համալսարան, որտեղ նրանք ներգրավվեցին Սիլիկոնյան հովտի մի շարք միջազգային ընկերությունների աշխատանքներում։
Հաջորդ քայլն այն էր, որ կրթական ծրագիրն ամբողջապես թարմացվեց և նորացվեց։ Այսօր ԵՊՀ «Տվյալների գիտությունը բիզնեսում» մագիստրոսական ծրագրի ուսումնական պլանները լիովին համապատասխանում են Սան Խոսեի պետական համալսարանի «Տվյալների վերլուծություն» ծրագրի ուսումնական պլանին։
Բանակցությունների արդյունքում ԵՊՀ-ն այսօր հնարավորություն ունի «Տվյալների գիտությունը բիզնեսում» ծրագրի մագիստրոսներին տրամադրելու բարձրագույն կրթության կրկնակի դիպլոմ։ Համագործակցության շնորհիվ «Տվյալների գիտությունը բիզնեսում» մագիստրոսական ծրագրի երկրորդ կուրսի երեք լավագույն ուսանողներ 2020 թ. սեպտեմբերից կարող են ուսումը շարունակել Սան Խոսեի պետական համալսարանում։ Ընդամենը մեկ տարի սովորելով ԱՄՆ-ում` ուսանողներին կրկնակի դիպլոմ ստանալու և հետագայում Հայաստանում լայն գործունեություն ծավալելու հնարավորություններ են ընձեռվում։
Այս կարևորագույն համագործակցության շնորհիվ ԵՊՀ-ն համարվում է նորագույն և գերպահանջված մասնագիտություններ ունեցող բուհերից մեկը։
«NVIDIA»-ԵՊՀ համագործակցություն
«Nvidia» ընկերությունն ունի ամբողջ աշխարհում առաջարկվող կրթական ծրագրերի նախաձեռնություն։ Այդ նախաձեռնության շրջանակում այսօր աշխարհի տարբեր համալսարանների դասախոսներ, անցնելով որոշակի գործընթացներ, միանում են «Nvidia» ընկերության կողմից մշակված կրթական ծրագրերին, որոնք հիմնականում տվյալների գիտության, արհեստական բանականության և ռոբոտաշինության ոլորտներն են ընդգրկում։
Այսօր ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագիրը միացել է «Nvidia»-ի նախաձեռնությանը: Այս պահին «EIF»-ի աջակցությամբ ԵՊՀ մի շարք երիտասարդ դասախոսներ գրանցվել են որպես «Nvidia»-ի կրթական ծրագրերի դասախոներ (Nvidia educator), իսկ երիտասարդ դասախոսներ Գագիկ Չախոյանը և Գևորգ Ղալաչյանն արդեն անցել են «Nvidia»-ի կրթական նախաձեռնության «դեսպանի» կարգավիճակի ստացման գործընթացը և հաստատվել են որպես «Nvidia»-ի «դեսպան»։ Նրանք «Nvidia» միակ «դեսպաններն» են ոչ միայն Հայաստանում, այլև մեր ամբողջ տարածաշրջանում:
Դա ենթադրում է, որ նշյալ դասախոսները հրավիրվելու են աշխարհի տարբեր համալսարաններ՝ «Nvidia»-ի կրթական տեխնոլոգիաները դասավանդելու և ներկայացնելու համար:
Այսպիսի կարգավիճակ ստանալու գործընթացը բավականին բարդ է, և այդպիսի կարգավիճակ կարող են ստանալ միայն աշխարհի առաջատար բուհերի դասախոսները։
Տվյալագիտության ոլորտը ամենադինամիկ զարգացող ոլորտն է աշխարհում, և ինչպես հետազոտական աշխատանքների, այնպես էլ կրթական ծրագրերի առումով անհրաժեշտ է մեծ ճկունություն այդ փոփոխություններին արագ և գրագետ արձագանքելու համար:
Եվ այսօր արդեն կարելի է փաստել, որ սկսած 2020 թ. սեպտեմբերից «Nvidia»-ի տեխնոլոգիաները կիրառվում են ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրում, ինչը հնարավորություն է տալիս նոր մակարդակի բարձրացնելու բարձրագույն կրթության դասավանդման որակը:
«Nvidia»-ի հետ համագործակցությունը հնարավորություն է տալիս, որ ԵՊՀ «Տվյալների գիտությունը բիզնեսում» մագիստրոսական ծրագիրը ոչ միայն արտերկրից «գիտելիք ներմուծի», այլև ինքն «արտահանի» որակյալ գիտելիք:
ԵՊՀ համագործակցությունը «Ձեռնարկությունների ինկուբատոր» հիմնադրամի (EIF), Ինովացիոն լուծումների և տեխնոլոգիաների (ISTC) կենտրոնի և «PMI Science»-ի հետ
Մագիստրոսական ծրագիրն իրականացվում է Սան Խոսեի պետական համալսարանի, «Ձեռնարկությունների ինկուբատոր» հիմնադրամի ու Ինովացիոն լուծումների և տեխնոլոգիաների կենտրոնի հետ համատեղ՝ «PMI Science»-ի աջակցությամբ:
«Տվյալների գիտությունը բիզնեսում» մագիստրոսական ծրագրի շրջանակում լավագույն ուսանողները յուրաքանչյուր տարի հնարավորություն ունեն օգտվելու «PMI Science»-ի աջակցությամբ «Ձեռնարկությունների ինկուբատոր» հիմնադրամի (EIF) կողմից տրամադրվող ֆինանսավորման հնարավորությունից։
Դասերն անցկացվում են ԵՊՀ-ում և Ինովացիոն լուծումների և տեխնոլոգիաների կենտրոնում (ISTC)` օգտագործելով վերջինիս ունեցած համակարգչային և ծրագրային ռեսուրսները։
