Տնտեսական քաղաքականություն և իրավունք

Ծրագիրը նախատեսված է բակալավրիատի շրջանավարտների (տարբեր մասնագիտությունների) համար, որոնք ցանկանում են զարգացնել մասնագիտական որակները, ստանալ նոր գիտելիքներ և տիրապետել տնտեսական իրավիճակները գնահատելու և առաջացած խնդիրները հաղթահարելու հմտությունների:

Ծրագիրը բաղկացած է ընդհանուր, մասնագիտական և կամընտրական դասընթացներից: Մասնագիտական պարտադիր և կամընտրական դասընթացներն ունեն կիրառական նշանակություն և ուղղվածություն, վերաբերում են տնտեսական զարգացման արդի խնդիրներին, մարտահրավերներին և ոլորտային փոփոխությունների կանխատեսումներին, տնտեսական քաղաքականությունների մշակմանը, տնտեսությունում հետազոտությունների և վերլուծությունների իրականացմանը, ճգնաժամային իրավիճակների հաղթահարման գործիքակազմի տիրապետմանը:

Ընդունելության պահանջները

ԵՊՀ մագիստրատուրայի 2023/2024 ուսումնական տարվա առկա և հեռակա ուսուցման ձևերով ընդունելությանը հնարավորություն ունեն դիմելու ՀՀ պետական և ըստ մասնագիտությունների հավատարմագրված (ինստիտուցիոնալ) հավատարմագրում անցած ոչ պետական այլ բուհերի բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

ԵՊՀ մագիստրատուրայի 2023/2024 ուսումնական տարվա առկա և հեռակա ուսուցման ձևերով ընդունելությունը կատարվելու է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Մանրամասները՝ «Ընդունելություն» բաժնում:

Ծրագրի նպատակը

Կրթական ծրագրի նպատակն է պատրաստել աշխատանքի շուկաների պահանջներին համապատասխան մրցունակ մասնագետներ՝ ունակ իրավիճակները գնահատելու և արդյունավետ որոշումներ ընդունելու, ուսանողներին տալ տեսական գիտելիք և գործնական հմտություններ տնտեսական զարգացման տարաբնույթ խնդիրներ լուծելու նպատակով: Հիմնական նպատակներից է ապահովել տնտեսական իրավիճակների վերլուծություններ և հետազոտություններ կատարելու մեթոդներին, մոդելներին և գործիքակազմին տիրապետելու հմտություններ, տալ անհրաժեշտ գիտելիքներ իրավական-օրենսդրական դաշտում կողմնորոշվելու և արդյունավետ քաղաքականություն մշակելու համար, ուսանողներին զինել տնտեսական ռազմավարությունների մշակման, դրանց նպատակաուղղված և ադապտիվ ներդրման հմտություններ:

Առավելությունները

Ծրագրի ավարտին ուսանողը կտիրապետի տնտեսության ուսումնասիրության և հետազոտություններ իրականացնելու մեթոդաբանությանը և գործիքակազմին, կկարողանա իրականացնել պետական և տնտեսական կառավարման ոլորտում սահմանված տնտեսաիրավական նորմերի գնահատում, մշակել զարգացման ծրագրեր՝ ժամանակակից օպտիմիզացիոն, էկոնամետրիկ և այլ մեթոդների կիրառությամբ, վերլուծել և գնահատել լոկալ և գլոբալ շուկաների շոկերը և դրանց հաղթահարման ուղիները, վերլուծել տնտեսության տարբեր ոլորտների կառավարման առանձնահատկությունները, ինչպես նաև պետական կառավարման և տեղական ինքնակառավարման սկզբունքները և եղանակները, տիրապետել տնտեսական ռազմավարությունների մշակման հմտություններին:

Երկրորդ կուրսում ուսանողներն անցնում են 6 շաբաթ տևողությամբ մասնագիտական պրակտիկա գործընկեր կազմակերպություններում և տնտեսության մասնավոր հատվածում։

Կարիերայի հնարավորությունները

Շրջանավարտը կարող է կրթությունը շարունակել կրթության հաջորդ մակարդակում՝ հասարակական և հումանիտար գիտությունների ոլորտում: