Հայոց լեզվի պատմություն և լեզվաբանություն

«Հայոց լեզվի պատմություն և ընդհանուր լեզվաբանություն» մագիստրոսական ծրագիրն իրականացվում է ԵՊՀ հայ բանասիրության ֆակուլտետի հայոց լեզվի պատմության և ընդհանուր լեզվաբանության ամբիոնում:

Ընդունելության պահանջները

Ընդունելության քննությունն անցկացվում է բանավոր:

Ընդունելության հարցաշարը տեղադրված է կայքի Ընդունելություն բաժնում:

Ծրագրի նպատակը

Ծրագրի հիմնական նպատակն է պատրաստել լայն ընդգրկման հայագետ լեզվաբաններ՝ դասական լեզուների իմացությամբ, այդ լեզուներից թարգմանություն-փոխադրություններ կատարելու հմտություններով, ինչպես նաև ծանոթացնել համակարգչային լեզվաբանության, ավտոմատ թարգմանության հիմունքներին։

Ուսումնառության ընթացքում ուսանողները ստանում են հնագույն ձեռագրեր կարդալու ու նկարագրելու գիտելիքներ և հմտություններ, սովորում են գրաբարյան, միջինհայերենյան և աշխարհաբարյան քննական բնագրեր կազմելու աշխատանքի սկզբունքները:

Կրթական ծրագրի հիմնական նպատակներից է ձևավորել հետազոտող լեզվաբան գիտնականներ՝ գրաբարագետներ, բարբառագետներ, խմբագիրներ, համակարգչային լեզվաբանության արդի աշխատաշուկայում պահանջարկված մասնագետներ։

Առավելությունները

Ծրագիրը բաղկացած է ընդհանուր, մասնագիտական պարտադիր և կամընտրական դասընթացներից: Մասնագիտական պարտադիր և կամընտրական դասընթացների բովանդակությունը վերաբերում է հայոց լեզվի պատմությանը և ընդհանուր լեզվաբանությանը, համակարգչային լեզվաբանությանը, դասական լեզուների՝ հին հունարենի, լատիներենի քերականական և բառապաշարային առանձնահատկություններին:

Այս ծրագրի ավարտին ուսանողներն ունակ կլինի ճանաչել հայոց լեզվի պատմության և ընդհանուր լեզվաբանության հիմնախնդիրները, տիրապետել այս գիտակարգերի հետազոտական մեթոդներին, հին գրական հայերենի՝ գրաբարի դասական և հետդասական շրջանների, ինչպես նաև միջին գրական հայերենի և աշխարհաբարի կառուցվածքային յուրահատկություններին, դրանց ընդհանրություններին ու տարբերություններին:

Շրջանավարտների կարիերայի հնարավորությունները

«Հայոց լեզվի պատմություն և ընդհանուր լեզվաբանություն» ծրագրի շրջանավարտները կարող են ուսումը շարունակել ասպիրանտուրայում։