ԻՆՉՊԵՍ ԿԱՏԱՐԵԼ ԳԻՏԱՀԵՏԱԶՈՏԱԿԱՆ ԱՇԽԱՏԱՆՔ

Դասախոսության բանախոսն էր Պատմության ֆակուլտետի Հայոց պատմության ամբիոնի դասախոս, պատմական գիտությունների դոկտոր, պրոֆեսոր Հայկազ Հովհաննիսյանը: Բանախոսությաան ընթացքում պարոն Հովհաննիսյանը ներկայացրեց գիտական աշխատանք կատարելու այն հմտություններն, որոնց պետք է տիրապետի սկսնակ հետազոտողը։

Բանախոսն անդրադարձ կատարեց այն սկզբունքներին, որոնցով պետք է առաջնորդվել թեմա ընտրելուց առաջ։ Ըստ Հովհաննիսյանի՝ ցանկացած հետազոտող պետք է թեմա ընտրելիս առաջնորդվի ոչ թե այն սկզբունքով, թե որքան հարուստ գրականություն կա տվյալ թեմայի վերաբերյալ, այլ հաշվի առնի, թե ինչ նորություն է բերելու իր աշխատանքով գիտական ասպարեզ։

Բանախոսը հետաքրքիր զուգահեռներ անցկացրեց պոետի և պատմաբանի աշխատանքների միջև՝ նշելով, որ պատմաբանին ևս հարկավոր է մուսա աշխատանք գրելուհամար, և, որ պատմաբանի համար հոդված գրելն ոչ թե ինքնանպատակ պետք է լինի, այլ հեղինակն իսկապես ասելիք պետք է ունենա։

Պրոֆեսորն անդրադարձավ այն խնդրին, որ այսօր սկսնակ հետազոտողներն իրենց առջև դնում են թվաքանակ ապահովելու խնդիր՝ ուշադրություն չդարձնելով աշխատանքի որակական հատկանիշներին, որի արդյունքում գիտական ոլորտը վերածվում է  «աղբանոցի»։

Դասախոսությունը հատկապես կարևոր էր ցածր կուրսեցիների, ինչպես նաև գիտություն մուտք գործել ցանկացող այն ուսանողների համար, ովքեր լավ չէին  տիրապետում գիտական հետազոտություն անցկացնելու հիմնական սկզբունքներին:

Դասախոսության ավարտին բանախոսը նշեց.  «Ֆակուլտետում նման հանդիպումները պետք է շարունակական բնույթ կրեն, քանի որ հենց նման քննարկումների շնորհիվ է, որ ուսանողներին առավել մանրամասն կներկայացվի, թե ինչպիսին պետք է լինի գիտական աշխատանքի կառուցվածքը»: Այնուհետև ուսանողներն իրենց հուզող հարցերն ուղղեցին բանախոսին և ստացան սպառիչ պատասխաններ:

Հեղինակ` Արգամ Համբարձումյան