Անցկացվում է ԵՊՀ շրջանավարտների ավարտական հանդիսավոր միջոցառումը

ԵՊՀ շրջանավարտների համայնքն ամենամեծն ու ընդգրկունն է Հայաստանում։ Համալսարանի շրջանավարտներն իրենց առանձնահատուկ և որոշիչ դերն ունեն գիտության, կրթության, մշակույթի, տնտեսության քաղաքականության և հասարակական կյանքի տարբեր բնագավառներում ինչպես Հայաստանում, այնպես էլ Հայաստանից դուրս։ Համալսարանի գործունեությունը միտված է ոչ միայն կրթության և գիտության ոլորտների զարգացմանը, այլև այդ գործընթացում իր շրջանավարտների ներգրավվածությունն ապահովելուն և նրանց հետ շարունակական կապ ստեղծելուն։ Այս տարի համալսարանն ունի բակալավրիատի 2223 առկա ուսուցմամբ ու 299 հեռակա ուսուցմամբ շրջանավարտ և մագիստրատուրայի 743 առկա ուսուցմամբ շրջանավարտ։

Միջոցառման մեկնարկն ազդարարվեց Հայաստանի Հանրապետության և Երևանի պետական համալսարանի օրհներգերով, որոնք կատարեց ԵՊՀ Շառլ Ազնավուրի անվան մշակույթի կենտրոնի երգչախումբը։

ԵՊՀ ռեկտոր Հովհաննես Հովհաննիսյանը, ողջունելով և շնորհավորելով 2022/2023 ուստարվա բոլոր շրջանավարտներին, հաջողություն մաղթեց նրանց հետագա նախաձեռնություններում և հորդորեց հպարտությամբ կրել համալսարանականի կոչումը՝ մշտապես մնալով «Երևանի պետական համալսարան» ընտանիքի անբաժանելի մասնիկն ու անդամը:

«Երևանի պետական համալսարանում սովորելու տարիներին դուք ոչ միայն ձեռք եք բերել մասնագիտական գիտելիքներ, այլև զարգացրել եք անընդհատ փոփոխվող աշխարհում արագ կողմնորոշվելու համար անհրաժեշտ հմտություններ ու կարողություններ, որոնք ճանապարհ կհարթեն ձեր մասնագիտական ուղին լավագույնս կազմակերպելու և մարտահրավերներին դիմակայելու համար։

Կոչ եմ անում վստահությամբ և լավատեսությամբ ընդունել բոլոր մարտահրավերներն ու հնարավորությունները, քանի որ դուք կյանքի նոր շրջափուլ եք մտնում հսկայական ներուժով և գիտելիքների մեծ պաշարով։ Ձեզնից յուրաքանչյուրը կարող է դրական փոփոխություն կատարել մեր երկրի և ամբողջ աշխարհի համար»,- նշեց Հ․ Հովհաննիսյանը։

ՀՀ ԿԳՄՍ փոխնախարար Արթուր Մարտիրոսյանը, ողջունելով շրջանավարտներին, իր խոսքում ընդգծեց կրթության և գիտության կարևորությունը երկրի առաջխաղացման գործում՝ մատնանշելով «Հայաստանի Հանրապետության կրթության՝ մինչև 2030 թվականը զարգացման պետական ծրագրի» նախագծում մարդկային կապիտալի վերաբերյալ սահմանված դրույթը, այն է՝ Հայաստանում մարդկային կապիտալը դիտվում է որպես երկրի զարգացման հիմնական ռեսուրս, իսկ կրթությունը՝ մարդկային կապիտալի զարգացման որոշիչ գործոն։

«ԵՊՀ շրջանավարտների ավարտական միջոցառումը տարվա կարևորագույն միջոցառումներից է։ ԵՊՀ-ն բացառիկ կրթական հաստատություն է, որն իր սկզբնավորումից ի վեր եղել և մնում է մեր երկրի որակյալ կրթության ու գիտության կազմակերպման, մտավոր ներուժի, մտքերի ու գաղափարների գեներացման հիմնական տեղն ու հարթակը։ Ես նույնպես ավելի քան մեկդարյա պատմություն ունեցող համալսարանի շրջանավարտ եմ, որը կոչում է, և պետք է յուրաքանչյուրս պատվով այն կրի»,- ասաց ՀՀ ԿԳՄՍ փոխնախարարը։

Ավարտական միջոցառման՝ այս տարվա հիմնական բանախոսը ԵՊՀ շրջանավարտ, Մարդու իրավունքների եվրոպական դատարանում (ՄԻԵԴ) ՀՀ ներկայացուցիչ Եղիշե Կիրակոսյանն է, որն անդամակցում է համալսարանի հոգաբարձուների խորհրդին, և որի նախաձեռնությամբ ԵՊՀ իրավագիտության ֆակուլտետում գալիք ուսումնական տարում մեկնարկելու է «Միջազգային դատարաններ և արբիտրաժ» կրթական ծրագիրը։ 

Ե․ Կիրակոսյանը, անդրադառնալով համալսարանում արդեն իսկ ավանդույթ դարձած այս միջոցառմանը, առանձնակի կարևորեց այն, որ միջոցառումը մասնագիտական կարիերայում որոշակի ուղի անցած ԵՊՀ շրջանավարտին հնարավորություն է տալիս իր փորձով և գաղափարներով հրապարակավ ցույց տալու հաջողության հասնելու ճանապարհը։

Միջոցառման հիմնական բանախոսը շրջանավարտներին հավաստիացրեց, որ համալսարանն ավարտելով՝ չեն դադարում սովորելուց, այլ հակառակը՝ շարունակում են կրթվել և մեկնարկում կյանքի նոր ուղի։

Մատնանշելով կարիերայի ստեղծման գործում համալսարանի դերակատարումը՝ Ե․ Կիրակոսյանը փաստեց․ «Ժամանակակից աշխարհում գիտելիք ձեռք բերելը խնդիր չէ։ Տեխնոլոգիական առաջընթացի պայմաններում գիտելիք և տեղեկատվություն հնարավոր է ստանալ հեշտությամբ։ Հետևաբար համալսարանական կրթության հաջողության ամենակարևոր նախադրյալներից մեկը, եթե ոչ ամենաորոշիչը, մարդուն մեթոդաբանական գիտելիքով, մտածելու և վերլուծելու ունակությամբ, ինչպես նաև մասնագիտական հմտություններով զինելն է։ Այս ամենը ձեզ համար հետագայում ծառայելու է որպես գործիք և բանալի՝ ցանկացած մարտահրավեր հաղթահարելու և տարբեր դռներ բացելու համար»։

Շրջանավարտներին տալով մասնագիտական ու անձնային զարգացմանն ուղղված խորհուրդներ և ամփոփելով խոսքը՝ Ե․ Կիրակոսյանն ընդգծեց․ «Այսօրվա աշխարհում կատարվող ցանկացած երևույթ հասկանալու համար գրեթե բոլոր դեպքերում անհրաժեշտ է ցուցաբերել միջգիտակարգային կամ միջճյուղային մոտեցում։ Մի՛ սահմանափակվեք սոսկ ձեր մասնագիտությամբ․ աշխարհը շատ ավելի խորն ու բազմաշերտ է, և հնարավոր չէ այն հասկանալ միայն մեկ դիտանկյունից։ Եղե՛ք լայնախոհ և միշտ պատրաստ՝ ընդունելու նորը»։

ԵՊՀ բոլոր շրջանավարտների անունից ելույթ ունեցավ փիլիսոփայության և հոգեբանության ֆակուլտետի մագիստրոս Հասմիկ Սարգսյանը՝ խոսելով համալսարանական տարիների, մասնագիտական ձեռքբերումների և դրանցում ԵՊՀ-ի ունեցած դերի մասին։

«Համալսարանական լինելը լոկ կոչում չէ, այլ մտածողություն, մշակույթ, փոխհարաբերություն, և որ ամենից կարևորն է՝ մարդկային կապիտալի ստեղծում։ Մեր դասախոսները մշտապես փորձում են մեր մեջ սերմանել գիտական աշխարհայացք, կամք և ջանասիրություն։ Թե՛ մենք, թե՛ պրոֆեսորադասախոսական կազմը կրողն ենք դարձել այդ բարդ պատասխանատվության, որը փորձել ենք արդարացնել և ավելի ուժեղանալ որպես անձ և անհատ։ Այսօր գիտակցում եմ, որ գիտելիքն ու կրթությունն անչափ կարևոր են փոփոխվող աշխարհի բազմաթիվ մարտահրավերներին դիմակայելու համար»,- ասաց Հասմիկը։

Միջոցառման ժամանակ ներկայացվեց նաև ԵՊՀ-ում ստեղծվող շրջանավարտների համայնքը՝ իր բաղադրիչներով։ Համայնքի շնորհիվ համալսարանն իր շրջանավարտներին ընձեռում է համալսարանական միջավայրում շարունակական ներգրավման, համալսարանի ու միմյանց հետ հաղորդակցվելու և համագործակցային բազմաթիվ հնարավորություններ։

Ցանցի հիմքում փոխկապակցված երկու միավորներ են՝ ԵՊՀ շրջանավարտների և կարիերայի կենտրոնն ու շրջանավարտների ներգրավմամբ և նրանց անմիջական մասնակցությամբ ձևավորված ցանցի կառավարման համակարգը։ Այս համակարգի շնորհիվ ԵՊՀ-ն հանձն է առնում իրականացնել կազմակերպական և հաղորդակցական գործառույթներ, իսկ շրջանավարտները՝ ցանցի բովանդակային բաղադրիչը ձևավորելու պարտավորություն։

Շրջանավարտների ցանցի ձևավորման և գործունեության պլանավորման համար ԵՊՀ-ն ամեն տարի կազմակերպելու է Շրջանավարտների կոնֆերանս, որի ընթացքում մշակվելու են ցանցի գործունեության ռազմավարությունն ու ծրագրերը, ձևավորվելու են Գործադիր խորհուրդը, տարածքային և մասնագիտական միավորները։

Շրջանավարտների համայնքի ներկայացուցիչները հատուկ զեղչով հնարավորություն կունենան օգտվելու ԵՊՀ հյուրերի տնից, համալսարանի տարբերանշանով ապրանքներից, ԵՊՀ տարածքի վարձակալությունից, մարզասրահից, ինչպես նաև համալսարանի գրադարանից։

Այնուհետև պաշտոնական մասին հաջորդեց շրջանավարտների համար կազմակերպված տոնական համերգը, որի ժամանակ կատարումներով հանդես են գալիս «Kami Friends», «By The Way» և «The Band» երաժշտական խմբերը:

Հիշեցնենք, որ նախորդ տարի ԵՊՀ շրջանավարտների ավարտական միջոցառումը տեղի է ունեցել Ալ. Սպենդիարյանի անվան օպերայի և բալետի ազգային ակադեմիական թատրոնի համերգասրահում, որտեղ ԵՊՀ պատվավոր պրոֆեսորի կոչում է շնորհվել բժշկության ոլորտում Նոբելյան մրցանակի արժանացած մոլեկուլային կենսաբան, նյարդաբան Արտեմ Փաթափությանին, և վկայագրեր են հանձնվել համալսարանի՝ գիտական աստիճան ստացած շրջանավարտներին։