Մասաչուսեթսի տեխնոլոգիական ինստիտուտի (MIT) ուսանողը ուսումնական պրակտիկա է անցնում ԵՊՀ-ում

Համալսարանի ընտրության, պրակտիկայի ընթացքում ձեռք բերած հմտությունների, ինչպես նաև Հայաստանի վերաբերյալ ունեցած պատկերացումների ու տպավորությունների մասին պատմել է ինքը՝ Սիմդին․․․

Պրակտիկայի համար ընտրել եմ Երևանի պետական համալսարանը, քանի որ...

MIT-Eurasia ծրագրի նպատակն է կազմակերպել Մասաչուսեթսի տեխնոլոգիական ինստիտուտի ուսանողների պրակտիկան ու հետազոտությունները, ինչպես նաև ստեղծել հնարավորություն դասավանդելու Արևելյան Եվրոպայի, Բալթյան երկրների, Կենտրոնական Ասիայի և Կովկասի տեղական ու միջազգային ընկերություններում, համալսարաններում, գիտահետազոտական ինստիտուտներում, հասարակական կազմակերպություններում և այլուր:

Թեև պրակտիկան պարտադիր չէր, այնուամենայնիվ ես ցանկանում էի զարգացնել գործնական հմտություններս, ուստի որոշեցի դիմել այս ծրագրին: Պրակտիկայի հնարավոր տարբերակներն ինձ համար շատ էին, բայց ընտրեցի Երևանի պետական համալսարանը, քանի որ ինձ շատ էր հետաքրքրում ԵՊՀ-ում անցկացվող պրակտիկայի ծրագիրը: Բացի դրանից, կարծում էի՝ հետաքրքիր կլինի հանդիպել իմ հասակակից ուսանողներին, որոնք հետաքրքրված են գիտության այն բնագավառներով, որոնք իմ ուսումնասիրության տիրույթում են, և չսխալվեցի:

ԵՊՀ-ում պրակտիկայի և Աննա Փոլադյանի հետ աշխատանքի գլխավոր ձեռքբերումներն են գիտելիքն ու փորձառությունը...

«Օրգանական թափոնների մշակում՝ արժեքավոր նյութեր արտադրելու համար» թեմայով պրակտիկաս ղեկավարում է ԵՊՀ կենսաքիմիայի, մանրէաբանության և կենսատեխնոլոգիայի ամբիոնի վարիչ, կ.գ.դ., դոցենտ Աննա Փոլադյանը:

Պրակտիկայի սկզբում Աննա Փոլադյանն ինձ համար անցկացրել է անհատական դասախոսություններ՝ հաղորդելով տեսական գիտելիքներ մանրէների խմորման, խմորման տեսակների, անթթվածին-թթվածնային շնչառության, դրանց տարբերությունների, մանրէներում ածխաջրերի յուրացման և մոլեկուլային ջրածնի ստացման վերաբերյալ, ապա հանձնարարվել է կատարել կաթնամթերքի արտադրության թափոնների նախամշակում, աղիքային ցուպիկի կուլտիվացում, մոլեկուլային ջրածնի ստացում, կենսաէներգետիկական պարամետրերի որոշում:

Երկամսյա պրակտիկայի ընթացքում ծանոթացել եմ ԵՊՀ մանրէաբանական կենսատեխնոլոգիաների և կենսավառելիքի նորարարական կենտրոնում ներդրված մանրէաբանական, կենսաքիմիական և օրգանական թափոնների մշակման մեթոդներին, ինչպես նաև մանրէաբանական կենսազանգվածի և արժեքավոր արտադրանքի (ֆերմենտներ, կենսաջրածին և այլն) ստացման անալիտիկ և կենսաքիմիական մեթոդներին:

Պրակտիկայի ընթացքում արդեն իսկ ստացել եմ բազմաթիվ գիտելիքներ և գրանցել հետազոտության հաջող արդյունքներ, ինչն իրականանում է Երևանի պետական համալսարանի հագեցած տեխնիկական սարքավորումների և հնարավորությունների շնորհիվ, իսկ Աննա Փոլադյանի հետ աշխատանքը լավագույն փորձառությունն էր ինձ համար: Նա շատ ընկերական ու ջերմ է՝ պատրաստակամ օգնելու և աջակցելու ցանկացած իրավիճակում:

Պրակտիկան ստեղծել է նոր հնարավորություններ․․․

Բացի մասնագիտական գիտելիքներից ու հմտություններից՝ ձեռք եմ բերել նոր ընկերներ ու ծանոթություններ: Ծրագրին մասնակցությունը հրաշալի հնարավորություն է ոչ միայն ԵՊՀ-ի մի մասը դառնալու, այլև առավել անմիջականորեն ծանոթանալու Հայաստանին, որը բացահայտել եմ յուրովի:

Այն ամենը, ինչը չէի իմանա Հայաստանի մասին, եթե եկած չլինեի...

Ես իսկապես վայելում եմ Հայաստանում անցկացրածս ժամանակը: Երևանից բացի՝ եղել եմ նաև Գյումրիում, որտեղ նշել եմ Վարդավառն իմ ընկերների հետ, ինչպես նաև Գառնիում, Գեղարդում, Հառիճավանքում և այլուր:

Շատ եմ հավանել հայկական խոհանոցը, ընկերական ու բարեհամբույր մարդկանց, արևային եղանակը, հայկական եկեղեցիներն ու բնաշխարհը և հատկապես հայոց լեռները:

Մինչև գալս շատ քիչ տեղեկություններ ունեի երկրի մասին, գիտեի տեղակայման մոտավոր տարածքը, պատմության ու մշակույթի որոշ դրվագներ, սակայն սեփական փորձառության շնորհիվ զգացածն ու տեսածն անգնահատելի են ու անմոռանալի: Հուսով եմ՝ կյանքի ուղիները ապագայում ինձ կրկին կբերեն Հայաստան:

Հիշեցնենք, որ MIT-Eurasia ծրագրի շրջանակում Մասաչուսեթսի տեխնոլոգիական ինստիտուտի երեք ուսանողներ ԵՊՀ-ում դասավանդել են և անցկացրել սեմինարներ։

Ուսանողների այցի մասին տեսանյութը՝ այստեղ։