Ամրապնդվում են ԵՊՀ-ի և Կադիսի համալսարանի գործընկերային կապերը. բացվել է Հայ-իսպանական լսարան

Երևանի պետական համալսարանի և Իսպանիայի Կադիսի համալսարանի միջև համագործակցությունն իրականացվում է տևական ժամանակ։ Այն առաջին հերթին միտված է հայ-իսպանական հարաբերությունների ամրապնդմանը, միջմշակութային, միջլեզվական հետազոտությունների կատարմանը և երկու ազգերի ներկայացուցիչների շրջանում փոխադարձ հետաքրքրությունների մեծացմանը։

Ստեղծված հայ-իսպանական բազմամասնագիտական կենտրոնն ունենալու է երկու նստավայր։ ԵՊՀ-ում հանդիսավորությամբ բացվեց կենտրոնի առաջին նստավայրը՝ հայ-իսպանական լսարանը, հաջորդիվ Կադիսի համալսարանում կբացվի կենտրոնի երկրորդ նստավայրը։ Ավելին․ նախաձեռնության կողմերը նպատակ ունեն հետագայում ընդլայնելու կենտրոնի աշխարհագրությունը՝ ստեղծելով համալսարանական ցանց։ Ցանցը կտարածվի ողջ Արևելյան Եվրոպայում և կդառնա միջհամալսարանական համագործակցությունների կենտրոն՝ ընդարձակելով հայ-իսպանական մշակույթի տարածվածության սահմանները։

Կենտրոնում ԵՊՀ իսպանագետները, համագործակցելով Կադիսի համալսարանի գործընկերների հետ, համատեղ մշակելու և իրականացնելու են ծրագրեր, կատարելու են գիտահետազոտական աշխատանքներ՝ ներառելով նաև հայ-իսպանական պատմամշակութային կապերի ուսումնասիրությունը, ինչպես նաև օժանդակելու են գիտության այլ բնագավառների ոչ լեզվակիր ներկայացուցիչներին ոլորտային հետազոտություններ կատարելիս։ Փոխգործակցության շրջանակում կկազմակերպվեն նաև դասախոսություններ՝ փորձի փոխանակման և միջգիտակարգային հետազոտություններին օժանդակելու նպատակով։ Գործակցության նախապայմաններից է նաև այն, որ կենտրոնի համար բուհերի կայքէջում կստեղծվեն համապատասխան բաժիններ։

Եվրոպական լեզուների և հաղորդակցության ֆակուլտետում կայացած հանդիպման սկզբում ԵՊՀ ակադեմիական/ուսումնական գծով պրոռեկտոր Էլինա Ասրիյանը, կարևորելով Կադիսի համալսարանի հետ համագործակցությունը, փաստեց, որ այն երկուստեք կընձեռի նոր հնարավորություններ և կխթանի բուհերի հետագա զարգացումը՝ նախանշելով գործակցային բազմաթիվ ուղիներ։

Կադիսի պատվիրակության ղեկավար, համալսարանի միջազգայնացման գծով պրոռեկտոր Ռաֆայել Կաստանյեդան, ընդգծելով հայ-իսպանական հարաբերությունների կարևորությունը, պատրաստակամություն հայտնեց հետագայում զարգացնելու առկա կապերը՝ կյանքի կոչելով համատեղ գաղափարներ ու նախագծեր։

Անդրադառնալով կենտրոնի բացման կարևորությանը՝ Ռ․ Կաստանյեդան նշեց․ «Սա իրապես պատմական և հիշարժան պահ է երկու համալսարանների համար, քանի որ այս կենտրոնի ստեղծմամբ ճանապարհ է բացվում դեպի նորարար նախաձեռնություններ։

Թերևս ավելի ավանդական կլիներ, եթե Իսպանիայում բացվեր հայերենի և հայ մշակույթի կենտրոն, իսկ Հայաստանում՝ իսպաներենի և իսպանական մշակույթի կենտրոն, սակայն որոշվեց, որ պետք է ստեղծվի մեկ՝ հայ-իսպանական կենտրոն՝ երկու նստավայրով։ Այսինքն՝ միասնական կենտրոնի աշխատանքները համակարգելու են երկու համալսարանները՝ միմյանց տրամադրելով անհրաժեշտ մարդկային և նյութական ռեսուրսներ, ինչպես նաև ազգային և միջազգային գործընկերների իրենց ցանցերը»։

Պատվիրակության ղեկավարն իր խոսքում հիշատակեց նաև տեխնիկայի, գիտության, արվեստի և այլ բնագավառների հայ մեծանուն ներկայացուցիչների անուններ, որոնք մեծ դեր են խաղացել համաշխարհային գիտության և արվեստի առաջընթացում:

«Այդ ամենը նույնպես լինելու է կենտրոնի հետազոտությունների տիրույթում, ուստի Հայ-իսպանական կենտրոնը չի սահմանափակվելու միայն իսպաներենի ու հայերենի և հայկական ու իսպանական մշակույթների տարածմամբ։ Այն նպատակ ունի նաև տարածելու մեր երկրների գիտական և ակադեմիական հաջողությունները՝ միասնական ուժերով կառուցելով այս նոր միասնական՝ հայ-իսպանական աշխարհը»,- ասաց պրոռեկտորը։

Ռ․ Կաստանյեդան իր ելույթում առանձնահատուկ կարևորեց նաև այս նախագծի ստեղծման գործում ռոմանական բանասիրության ամբիոնի դերը՝ այն համարելով հայ իսպանագիտության ձևավորման կենտրոն և շարժիչ ուժ:

ԵՊՀ եվրոպական լեզուների և հաղորդակցության ֆակուլտետի դեկան Գևորգ Բարսեղյանը, շեշտելով լսարանի դերը, փաստեց, որ վերջինիս բացումը վկայում է Հայաստանում իսպաներենի հանդեպ օրըստօրե մեծացող հետաքրքրության մասին:

«Սա ոչ միայն հիմք է կրթական և մշակութային կապերն ամրապնդելու, այլև դասախոսների և ուսանողների նորանոր շարժունության ծրագրեր կյանքի կոչելու համար»,- ընդգծեց Գ․ Բարսեղյանը։

Մեզ հետ զրույցում ԵՊՀ եվրոպական լեզուների և հաղորդակցության ֆակուլտետի ռոմանական բանասիրության ամբիոնի վարիչ Հասմիկ Բաղդասարյանը, որը մեծ ջանքեր է ներդրել այս կենտրոնի բացման համար, նշեց, որ Կադիսի համալսարանը իսպանական միակ համալսարանն է, որն ունի Արևելյան Եվրոպայի և Կենտրոնական Ասիայի հետ նախագծերի հատուկ բաժանմունք։ Բացի դրանից՝ համալսարանն ունի միջազգային ծրագրերի իրականացման մեծ փորձ: Նրա խոսքով՝ կրթական նոր մարտահրավերներին դիմակայելու համար միջազգային այսօրինակ համագործակցությունը ժամանակի հրամայականներից է:

«Այս համագործակցությունը միտված է խթանելու Ռոմանական բանասիրության ամբիոնում իրագործվող ծրագրերի կատարելագործումը և ամբիոնում կատարվող գիտահետազոտական աշխատանքները»,- անդրադառնալով նորաբաց լսարանի առավելություններին՝ փաստեց ամբիոնի վարիչը:

Հայ-իսպանական լսարանի բացման արարողությանը ներկա էր Հայաստանում Իսպանիայի դեսպանատան գործերի ժամանակավոր հավատարմատար Քրիստինա Կոնեսան, որն իր ելույթում անդրադարձավ հայ-իսպանական կապերին՝ հիշատակելով պատմական նշանակալի դրվագներ և միջմշակութային տարբեր իրողություններ։

Լսարանի բացման արարողությանը գեղեցիկ և հիշարժան ելույթով հանդես եկան Ռոմանական բանասիրության ամբիոնի իսպանական բաժնի չորրորդ կուրսի ուսանողները՝ յուրահատուկ ձևով ներկայացնելով Կադիսի պատմամշակութային հիմնական խորհրդանիշները:

Հատկանշական է, որ այցի շրջանակում դասախոսություններ են կարդացել Կադիսի համալսարանի Լեզվական քաղաքականության վարչության ղեկավար Ֆրանսիսկո Խավիեր դե Կոսը (թեմա՝ «Այն ինչ ասում է Լեզվի ակադեմիան և այն ինչ անում է լեզվի կրողը. նորմայի և կիրարկության միջև անհամաձայնություններ») ու Արևելյան Եվրոպայի և Կենտրոնական Ասիայի հետ համագործակցության համալսարանական կենտրոնի պատասխանատու Անդրես Սանտանան (թեմա՝ «Գրավոր և բանավոր թարգմանչի մասնագիտությունը Իսպանիայում»):

Դասախոսությունների թեմաներն ընտրվել են՝ հաշվի առնելով երկուստեք հետաքրքրություն ներկայացնող բնագավառները։

Հիշեցնենք, որ դեռևս անցյալ տարի իսպանացի հանրաճանաչ գրող, ճարտարապետ և քաղաքաշինարար Գոնսալո Հ. Գուարչը Երևանի պետական համալսարանին էր նվիրել ֆրանսիացի նշանավոր արվեստագետ Լյուսիեն Շառլ Էդուարդ Ալիոյի (1877-1956 թթ.) հեղինակած՝ Դոն Կիխոտի բրոնզե քանդակը։ Քանդակին կից Գ․ Գուարչը ԵՊՀ ռեկտոր Հովհաննես Հովհաննիսյանին էր հղել շնորհակալական մի նամակ, որտեղ ընդգծված էին ԵՊՀ-ում իսպաներենի դասավանդման գերազանցությունը և հայ-իսպանական մշակութային ու ազգային մտածողության փոխառնչությունները։ Նամակը իսպաներենից հայերեն թարգմանել էր Կադիսի համալսարանի դոկտորանտ, ԵՊՀ շրջանավարտ Անահիտ Մարգարյանը։ Վերջինս, ուսումնառությունը շարունակելով Իսպանիայի Կադիսի համալսարանում, այսօր, կարելի է ասել, դարձել է յուրահատուկ կապող օղակ երկու համալսարանների միջև

Մանրամասները՝ տեսանյութում: