Երևանի պետական համալսարանի և «Էփրիքոթ Կապիտալ» ընկերության միջև կնքվել է համագործակցության հուշագիր

Համագործակցության նպատակն է համատեղ ջանքերով, փորձով և ռեսուրսներով նպաստել կրթական ու գիտահետազոտական ծրագրերի իրագործմանը, իրականացնել ԵՊՀ պրոֆեսորադասախոսական կազմի վերապատրաստման դասընթացներ, ուսումնաարտադրական պրակտիկաներ և դասընթացներ ԵՊՀ ուսանողների համար, տրամադրել դրամաշնորհներ (հատկապես Արցախից բռնի տեղահանված ուսանողներին), մշակել ու իրագործել կրթական և հետազոտական ծրագրեր, կազմակերպել գիտաժողովներ, գիտական սեմինարներ, կլոր սեղան-քննարկումներ, իրագործել սոցիալական տարբեր ծրագրեր և այլն։

Բացի դրանից՝ ԵՊՀ մարքեթինգի բաժնի ու «SPRING PR» ընկերության նախաձեռնությամբ, ինչպես նաև ԵՊՀ շրջանավարտների և կարիերայի կենտրոնի աջակցությամբ այսօր ստորագրված հուշագրի շրջանակում կողմերը համագործակցելու են նաև ենթակառուցվածքների վերանորոգման և անվանակոչման հետ կապված հարցերի ու ԵՊՀ կենտրոնական մասնաշենքի դիմացի այգու բարեկարգման աշխատանքների ուղղությամբ։

Հուշագրի ստորագրման արարողությանը ներկա էին  ԵՊՀ ընդհանուր հարցերի գծով պրոռեկտոր Արման Մալխասյանը, Շրջանավարտների և կարիերայի կենտրոնի փոխտնօրեն Կարինե Նազարյանը, Մարքեթինգի բաժնի պետ, ծառայությունների առևտրայնացման պատասխանատու Ազնիվ Գրիգորյանը, «Էփրիքոթ Կապիտալ» ընկերության հիմնադիր Վարդան Ամարյանը, «SPRING PR» ընկերության համահիմնադիր, միջազգային ծրագրերի նախագծերի ղեկավար Տաթևիկ Սիմոնյանը և նախագծի ղեկավար Մարինե Գրիգորյանը։

ԵՊՀ ռեկտոր Հովհաննես Հովհաննիսյանը, կարևորելով ժամանակակից դինամիկ զարգացող աշխարհում բուհ-մասնավոր ընկերություն համագործակցությունը, նշեց, որ այն պարզապես գործընկերություն չէ, այլ գերազանցությանը, նորարարությանը և որակյալ կադրերի պատրաստմանը նպաստելու համատեղ հանձնառություն․ «Այսպիսի համագործակցություններն օգնում են համադրելու ակադեմիական տեսությունները, գործնական հմտություններն ու աշխատաշուկայի պահանջները, հնարավորություն տալիս համատեղ հետազոտությունների միջոցով ապահովելու զարգացում և առաջընթաց, ինչպես նաև ստեղծելու, սովորելու և աշխատելու համար ոգեշնչող միջավայր»։

«Էփրիքոթ Կապիտալ»-ի հիմնադիր Վարդան Ամարյանը մեծապես կարևորեց կրթության ոլորտում նման համագործակցությունների դերը. «Մեր անցած ճանապարհն ու կուտակած փորձը փաստում են, որ կրթությունն է ամենակարևորն ու առանցքայինը՝ պահանջված մասնագետ դառնալու և անընդհատ հաջողություններ գրանցելու գործում։ Երբ Հայաստանում հիմնում էինք «Էփրիքոթ Կապիտալ» ներդրումային ընկերությունը, զգում էինք ոլորտում մասնագիտացած և փորձառու կադրերի բացը։ Այդ պատճառով էլ նմանօրինակ համագործակցությունները մեզ համար շատ կարևոր են. մենք կարողանում ենք հայ ուսանողներին և երիտասարդներին հասանելի դարձնել միջազգային ֆինանսական ոլորտի փորձը, որը կուտակել ենք երկար տարիների աշխատանքի շնորհիվ և մեր ընկերության թիմը համալրել նոր, գիտակ կադրերով»,- նշեց Վարդան Ամարյանը և հավելեց, որ հուշագիրը հնարավոր երկարատև համագործակցության սկիզբն է միայն, բուհ-մասնավոր հատված փոխգործակցությամբ տարաբնույթ նախագծեր կիրականացվեն։

Կողմերը փաստեցին, որ համագործակցության արդյունքները կլինեն առարկայական և տեսանելի կարճ ժամկետներում։