Շվեդիայի Թագավորության արտակարգ և լիազոր դեսպանը դասախոսություն կարդաց ԵՊՀ-ում

Խոսելով Շվեդիայի աջակցությամբ Հայաստանում իրականացվող զարգացման ծրագրերից՝ դեսպանը նշեց, որ դրանց մեծ մասն ուղղված է ժողովրդավարության ամրապնդմանը, մարդու իրավունքներին, գենդերային հավասարությանը, կոռուպցիայի կանխարգելմանը, տնտեսական զարգացմանը, շրջակա միջավայրի պահպանությանը։

Պատրիկ Սվենսոնը, անդրադառնալով ՀՀ-ում գործող այն կազմակերպություններին և հիմնադրամներին, որոնց հետ ունեն գործընկերային հարաբերություններ, ասաց, որ ՀՀ քաղաքացիները հնարավորություն ունեն  պարբերաբար հայտարարվող դրամաշնորհների մրցույթների շրջանակում իրենց նախագծերը ներկայացնելու այդ կառույցներին և ստանալու ֆինանսավորում։

«Մենք ֆինանսավորում ենք նաև թափոնների կառավարման ոլորտում իրականացվող ծրագրերը, նպաստում էլեկտրաարդյունավետության բարձրացմանը, համագործակցում դատական համակարգի հետ, որ դատավորները դառնան ավելի փորձառու, ինչպես նաև առավել արդյունավետ աշխատեն ԶԼՄ-ի հետ։ Աջակցում ենք նաև ՀՀ ԶՈՒ-ում կանանց ներգրավմանը նպաստող ծրագրերին»,- ասաց Պատրիկ Սվենսոնը։ 

«Ինձ համար շատ հետաքրքիր է աշխատել Հայաստանում․ մշակույթը, լանդշաֆտը ինձ հիացնում են, մարտահրավերներին դիմակայելու մարդկանց պատրաստակամությունը՝ ևս»,- ընդգծեց դեսպանը։ 

Դասախոսությունից հետո ԵՊՀ պրոֆեսորադասախոսական կազմի ներկայացուցիչները և ուսանողները հնարավորություն ունեցան իրենց հետաքրքրող հարցերն ուղղելու դեսպանին։