ԵՊՀ-ն համագործակցության համաձայնագիր է կնքել՝ զարգացնելու քիմիայի ուղղությունը

Համաձայնագրով ԵՊՀ-ն և «Ինստրուկտարիում» ընկերությունը միավորելու են իրենց ջանքերը քիմիայի, սննդի անվտանգության, լաբորատոր գործունեության, ստանդարտացման, արդյունաբերական անվտանգության և այլ ոլորտներում գիտահետազոտական աշխատանքներ կատարելու, համատեղ մագիստրոսական և բակալավրիատական կրթական ծրագրերի իրականացման համար:

Սահմանված նպատակներին հասնելու համար կողմերը պատրաստակամ են ներդնելու ուսումնալաբորատոր, գիտաարտադրական ու ուսումնամեթոդական բազաներ, լաբորատորիաներ, մարդկային ռեսուրսներ, մասնագիտական գիտելիքներ, ունակություններ և հմտություններ:

Համաձայնագրի շրջանակում ընկերությունը վերապատրաստման դասընթացներ է կազմակերպելու ԵՊՀ քիմիայի ֆակուլտետի համակազմի և սովորողների համար «Աշխատողների անվտանգության ապահովում և առողջության պահպանություն, անվտանգության պահանջները քիմիական լաբորատորիաներում, հրդեհային անվտանգություն, առաջին մինչբժշկական օգնություն» թեմաներով: 

Բացի դրանից՝ համատեղ իրականացվելու են ծրագրեր՝ միտված ուսանողների մասնագիտական գիտելիքների, գործնական և լաբորատոր հմտությունների ու կարողությունների զարգացմանը, ինչպես նաև կազմակերպվելու են պրակտիկաներ, գործնական և լաբորատոր պարապմունքներ։