Ոլորտում լավագույնը լինելու ձգտումը՝ հաջողության բանաձև

Հայարփին 2023 թ. ավարտել է ԵՊՀ քիմիայի ֆակուլտետի «Սննդի անվտանգություն» բակալավրի կրթական ծրագիրը` գերազանց պաշտպանելով ավարտական աշխատանքը: Այժմ սովորում է համանուն մագիստրոսական կրթական ծրագրի 2-րդ կուրսում։

Նա դպրոցական տարիներին մասնակցել է մի շարք օլիմպիադաների, որոնց արդյունքները ավելի են մեծացրել նրա հետաքրքրությունները քիմիայի նկատմամբ։ Ուսանողական տարիներին ոլորտին ավելի մոտ գտնվելը և մշտապես զարգանալու հնարավորություն ունենալը ճանապարհ են հարթել քիմիայի ոլորտում նոր բացահայտումների։

«Բնագիտական առարկայի ընտրությունը պարտավորեցնող է, ճանապարհը՝ բավականին խրթին, բայց միևնույն ժամանակ ոլորտը տալիս է միշտ աճելու և առաջընթաց ապրելու հնարավորություն, ինչն էլ մոտիվացիա է նոր բացահայտումների համար։ Այդ իսկ պատճառով, կարծում եմ, որ չեմ սխալվել մասնագիտության ընտրության հարցում»,- ասում է ԵՊՀ ուսանողը։

Համալսարանում ստացած տեսական գիտելիքները Հայարփին այժմ կիրառում է գործնականում` ԵՊՀ անօրգանական և անալիտիկ քիմիայի գիտահետազոտական լաբորատորիայում կատարելով հետազոտություններ։ 

«Ներկայում ներգրավված եմ ՀՀ ԿԳՄՍՆ բարձրագույն կրթության և գիտության կոմիտեի կողմից ֆինանսավորվող դրամաշնորհային ծրագրում՝ «Վայրի աճող բուսատեսակների ֆիզիկաքիմիական հատկությունների ուսումնասիրում, կենսաակտիվ միացությունների անջատում և արտադրական տարբեր բնագավառներում կիրառման հնարավորության ուսումնասիրում» վերտառությամբ։ Ծրագրի շրջանակում ուսումնասիրում ենք կենսաբանական ակտիվություն ունեցող բույսերի տարբեր ֆիզիկաքիմիական հատկություններ»,- մատնանշում է Հայարփին։ 

ԵՊՀ լավագույն ուսանողը հասցրել է նաև համահեղինակել գիտական հոդված, որը հրապարակվել է «Elsevier» հրատարակչության 1-ին քառորդում գրախոսվող «Heliyon» ամսագրում` «Հայաստանի վայրի բնության մեջ աճող մատուտակի արմատների (Glycyrrhiza glabra L.) հակաօքսիդանտ ակտիվության և ծանր մետաղների պարունակության գնահատում» վերնագրով։ Նա, ներկայացնելով հոդվածի բովանդակությունը, ընդգծում է, որ հետազոտման առարկա են եղել ՀՀ 5 մարզերում աճեցված մատուտակի արմատները, ուսումնասիրվել և համեմատվել են դրանց հակաօքսիդանտային ակտիվությունը, որոշ նպատակային ծանր մետաղների, դաբաղանյութերի, ֆլավոնոիդների և տանինների քանակները։

Հայարփին իր արձանագրած հաջողությունների շարքում կարևորում է նաև համալսարանի ՈՒԽ-ում հասարակական աշխատանք ծավալելու հնարավորությունը. «2021-2024 թթ. եղել եմ ԵՊՀ ուսանողական խորհրդի նախագահության անդամ՝ փորձելով մշտապես բարձրաձայնել ուսանողներին առնչվող խնդիրները, առաջարկելով լուծումներ, ներկայացնելով նրանց շահերն ու իրավունքները բուհի կառավարման մարմիններում։ Մինչ օրս ֆակուլտետի գիտական խորհրդի սովորող անդամ եմ»։

ԵՊՀ լավագույն ուսանողն արդեն մեկ տարի է` աշխատում է «Խաչատրյան մոբիլսերվիս» ՍՊԸ-ում՝ որպես քիմիկ-տեխնոլոգ։ Նա, խոսելով իր ձեռքբերումներից, կարևորում է ինչպես գործատու ընկերության, այնպես էլ համալսարանի դերը, քանի որ ԵՊՀ-ի և մասնավոր հատվածի միջև համագործակցության արդյունքում է նրան հաջողվել ընդունվել աշխատանքի։ 

Հայարփին վստահ է` ՀՀ յուրաքանչյուր քաղաքացի իր մասնագիտության մեջ պետք է լինի լավագույնը կամ գոնե ձգտի լավագույնին՝ ավելի հզոր հայրենիք և կայացած հասարակություն ունենալու համար։