ԵՊՀ ՈՒՍԱՆՈՂՈՒՀԻՆ «ՉԻՆԱՐԵՆԻ ԿԱՄՈՒՐՋ» ՄՐՑՈՒՅԹՈՒՄ ԶԲԱՂԵՑՐԵԼ Է ԵՐԿՐՈՐԴ ՏԵՂԸ

«Չինարենի կամուրջ» ամենամյա մրցույթըկազմակերպվում է Հայաստանում Չինաստանի Ժողովրդական Հանրապետության դեսպանության կողմից և համակարգվում Վ. Բրյուսովի անվան պետական լեզվահասարակագիտական համալսարանի (ԵՊԼՀ) Կոնֆուցիուսի ինստիտուտի կողմից:

Մրցույթն անցկացվում է 4 փուլով. առաջին փուլում մասնակիցները հանձնում են գրավոր քննություն երեք առարկաներից` չինական մշակույթ, երկրագիտություն (Չինաստան) և չինարեն (ընդհանուր լեզվաբանական գիտելիքներ), 2-րդում՝ պատասխանում Չինաստանին վերաբերող հարցերին, 3-րդ փուլում չինարեն ելույթ պատրաստում նախօրոք տրված թեմայի վերաբերյալ, իսկ 4-րդում ներկայացնում են մշակութային համար:

Մրցույթի առաջին և երկրորդ փուլերը տեղի են ունեցել դեռևս մայիսի 10-ին: Իսկ ահա երրորդ և չորրորդ փուլերն անցկացվել են մայիսի 16-ին, որտեղ մասնակիցները հանդես են եկել «Մեկ աշխարհ, մեկ ընտանիք» խորագիրը կրող ճառով, ապա ներկայացրել գեղարվեստական համարներ, որոնք պարունակել են չինական մշակութային տարրեր:

Այս տարի մրցույթին մասնակցել են հայաստանյան բուհերի 6 ուսանողներ: ԵՊՀ-ն ներկայացրած Միջազգային հարաբերությունների ֆակուլտետի երրորդ կուրսի ուսանողուհի Մանե Գասպարյանն արդեն երկրորդ տարին է, ինչ մասնակցում է մրցույթին: Անցած տարի Մանեն նույնպես հաղթող էր ճանաչվել «Լավագույն ճառ» անվանակարգում՝ ելույթ ունենալով «Մեկ աշխարհ, մեկ ընտանիք» խորագիրը կրող ճառով, որի ժամանակ նշել էր, որ այս աշխարհում ապրող բոլոր ժողովուրդները մեկ ընտանիքի անդամներ են:

Նրա խոսքով, ֆակուլտետի Չինարենի և չինական մշակույթի կենտրոնը մեծապես քաջալերում, խրախուսում  և ամեն կերպ աջակցում է ուսանողների մասնակցությունն այս մրցույթին:

«Հատուկ ուզում եմ շնորհակալություն հայտնել չինարենի դասախոս Ճանգ Յավնին և կենտրոնի ղեկավար Արթուր Իսրայելյանին՝ նրանց կատարած աշխատանքի և աջակցության համար: Այս անգամ էլ փորձեցի պատվով ներկայացնել ԵՊՀ-ն և խորհրդանշական է, որ դա տեղի ունեցավ ԵՊՀ 100-ամյակի օրը»,- մեզ հետ զրույցում ասաց Մանե Գասպարյանը:

Այս տարի մրցույթին երկրորդ հորիզոնականը զբաղեցրած Մանե Գասպարյանի ներկայացրած ճառը հայ-չինական հարաբերությունների մասին էր, որում նա հատկապես ընդգծել է Հայաստանում չինացի ուսուցիչների անձնանվեր գործունեությունը, որոնք միշտ օգնում են հայ ուսանողներին և աշակերտներին այնպես, ինչպես դա անում են ընտանիքի անդամները: Իսկ որպես գեղարվեստական համար՝ Մանեն հանդես է եկել չինարեն երաժշտական կատարմամբ:

Մեզ հետ զրույցում Մանե Գասպարյանն ասաց, որ չինարեն սկսել է սովորել հենց ԵՊՀ-ում և հետագայում ակտիվորեն մասնակցել է Կոնֆուցիոսի ինստիտուտի կողմից կազմակերպած մրցույթներին: Նա ցանկանում է ուսումը շարունակել Չինաստանում:

Հիշեցնենք, որ մրցույթի առաջին և երկրորդ տեղերը զբաղեցրած մասնակիցները հնարավորություն կստանան մեկնելու Չինաստան և մասնակցելու մրցույթի եզրափակիչ փուլին:

Պատրաստեց Քնար Միսակյանը