ԼԵԶՈՒՆԵՐ ՍՈՎՈՐԵԼՈՒ ԳԱՂՏՆԻՔԸ. ՊԵՏՔ Է ՀԱՃՈՒՅՔՈՎ ՍՈՎՈՐԵԼ

Վերհիշելով տարիներ շարունակ նույն գրքերի վրա անցկացրած անքուն գիշերները՝ շատերը փշաքաղվում են, չէ՞ որ անվերջ թվացող անկանոն բայերը, ժամանակաձևերը, կանոններն ու բացառությունները դարձել են վատ երազի պես մի բան:

Մարդկանց հիացնում են պոլիգլոտները՝ մի քանի լեզուների վարժ տիրապետող կիսաստվածները:

Համաժամանակյա թարգմանիչ Լիդիա Մախովան «TED» հիմնադրամի համաժողովի ժամանակ ելույթ է ունեցել նոր լեզու սովորելու գաղտնիքների մասին:

Նա պոլիգլոտ է և, ինչպես պատմում է իր ելույթի ընթացքում, սիրում է նոր լեզու սովորել և դա անում է յուրաքանչյուր երկու տարին մեկ:

Այժմ նա տիրապետում է 9 լեզվի: «Երբ մարդիկ իմանում են, որ ես տիրապետում եմ 9 լեզվի, զարմացած հարցնում են, թե որն է լեզուների իմացության իմ գաղտնիքը: Երկար տարիներ պատասխանում էի, որ ես ուղղակի սիրում եմ լեզու սովորել»,- պատմում է Լիդիան:

Այդպիսի պատասխանը, բնականաբար, չէր գոհացնում մարդկանց, և Լիդիան որոշեց խորհրդակցել իր նման պոլիգլոտների հետ՝ հասկանալու, թե որն է գաղտնիքը:

Խոսելով տարբեր պոլիգլոտների հետ՝ նա պարզեց, որ մեկը սկսում է ուսումնասիրվող լեզվի հնչյուններն ընդօրինակելուց, մյուսը սերտում է քերականությունը:

Լիդիան պատմում է իռլանդացի Բեննիի մասին, որը 11 տարի դպրոցում փորձել է սովորել իռլանդոգելյան լեզուն և 5 տարի տառապել է գերմաներեն ուսումնասիրելիս: Դպրոցն ավարտելիս նա չէր կարողանում սովորել այդ լեզուներով: 21 տարեկանում Բեննին բացահայտեց իր համար լավագույն մեթոդը՝ շփումը լեզվակրի հետ հենց առաջին օրվանից: Չվախենալով սխալվելուց՝ նա գրանցում է հիանալի արդյունքներ:

Բրազիլացի Լուկասը դասարանում ամենավատ աշակերտն էր, 10 տարվա փորձից հետո նրա այդպես էլ չէր կարողանում անգլերեն սովորել: Ընկերները նրան ծաղրում էին: 10 տարի անց նա խոսում է 11 լեզվով:
Լուկասն ունի լեզու սովորելու շատ հետաքրքիր մեթոդ: Ենթադրենք՝ նա ուզում է սովորել ռուսերեն: «Skype»-ով կապ հաստատելով ռուսախոսների հետ՝ Լուկասը համացանցում գտնում է ողջունելու ձևը, այն պատճենում և ուղարկում զրուցակցին: Երբ նա պատասխանում է, այդ պատասխանն ուղարկում է մեկ այլ զրուցակցի: Եվ այդպես շարունակ: Շատ կարճ ժամանակում նա սերտում է խոսակցական ամենակարևոր արտահայտությունները:

Լսելով տարբեր մեթոդների մասին՝ Լիդիան հասկանում է, որ պոլիգլոտների համար ընդհանուր է մեկ բան. նրանք գտել են սովորելու ընթացքից հաճույք ստանալու ձևը:

Ըստ Լիդիայի՝ բոլոր պոլիգլոտներն այնպես էին պատմում իրենց մեթոդների մասին, կարծես թե դա զվարճանք լիներ:

Լիդիան պատմում է նաև, թե ինչպես է սովորել իսպաներեն և գերմաներեն:

Ձանձրալի համարելով իսպաներենի դասագիրքը՝ նա որոշում է իսպաներենով կարդալ Հարի Փոթերի արկածների մասին գրքերը: Սկզբում, իհարկե, ոչինչ չի հասկանում, բայց կանգ չի առնում: Գրքի վերջում նա հասկանում էր պատումն առանց բարդության:

Իսկ գերմաներենի դեպքում օգնել է «Friends» հեռուստասերիալը: Լիդիան անկեղծանում է, որ սկզբում չէր տարբերում մի բառը մյուսից, իսկ երրորդ սեզոնից սկսեց հասկանալ կատակները:

Առանձնացնելով լեզուն սովորելու 4 սկզբունք՝ Լիդիան առաջնահերթ է համարում գործը հաճույքով անելը:

Երկրորդ սկզբունքը համապատասխան և արդյունավետ մեթոդ գտնելն է, այնպիսին, որը կհամապատասխանի սովորողի տեսակին:

Երրորդ սկզբունքը համակարգային ուսուցումն է: Պետք է անպայման գտնել ժամանակ լեզուն սովորելու համար: Քայլելիս, մեքենա վարելիս, տանը գործ անելիս կարելի է միացնել աուդիոգրքեր, և մեկ քայլ առաջ գնալ լեզու սովորելու համար: Այստեղ կարևոր է մշակել սովորելու ծրագիրը՝ հստակ օրերով ու ժամերով:

Լիդիան շատ կարևոր է համարում չորրորդ սկզբունքը՝ համբերությունը: Իհարկե, բոլորն էլ ցանկանում են երկու օրում վարժ տիրապետվել նոր լեզվի: Ըստ Լիդիայի՝ աննկարագրելի է փոքր հաղթանակների վայելքը:

Ամենամեծ շարժառիթը համարելով սեփական հաջողությունը՝ Լիդիան խորհուրդ է տալիս երբեք չնահանջել և երկրորդ հնարավորություն տալ լեզուներ սովորելուն, անգամ եթե նախորդ անգամ անհաջողություն է գրանցվել:

Մարի Ռաֆյան