«ԵԿԵՔ ՀԱՍԿԱՆԱՆՔ» ՀԵՌՈՒՍՏԱՆԱԽԱԳԾԻ ԼՐԱԳՐՈՂՆԵՐԸ՝ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՈՒՄ

Հանդիպումը կազմակերպել էր ԵՊՀ ժուռնալիստիկայի ֆակուլտետի ՈՒԽ-ն:

Աելիտա Չիլինգարյանը և Սոնա Աբրահամյանը մեծ սիրով կիսվեցին ապագա լրագրողների հետ իրենց մասնագիտական փորձով և պատասխանեցին վերջիններիս հուզող հարցերին:

Հանրայինի հեռուստատեսության եթերում «Եկեք հասկանանք» հեռուստանախագիծը ցուցադրվում է արդեն երեք եթերաշրջան՝ այս ընթացքում հասցնելով բանավեճ-շոուից վերածվել սոցիալական հաղորդման:

Հանդիպման սկզբում հյուրերն ամենայն մանրամասնությամբ ներկայացրին Հայաստանում թոքշոուներ պատրաստելու առանձնահատկությունները, խնդիրներն ու մարտահրավերները:

«Թոքշոուներ պատրաստելիս պետք է հաշվի առնել, որ քչերը տաղավար կգան, իսկ տաղավարում շատերն ուզում են միայն իրենց կարծիքն արտահայտել և չբանավիճել, մյուսները գերադասում են ամբողջ ընթացքում պարզապես լռել»,- նշեց Աելիտա Չիլինգարյանը:

Ըստ Աելիտա Չիլինգարյանի՝ այս դեպքում շատ կարևոր է հաղորդավարի գործառույթը, որը պետք է կարողանա ժամանակին հյուրին խոսք տրամադրել, կամ ընդհատել հյուրի խոսքը, որի համար հաղորդավարը շատ հաճախ կարող է նաև քննադատության ենթարկվել:

Ժամանակակից հեռուստատեսության համար թոքշոու պատրաստելիս պետք է հաշվի առնել նաև այն, որ հեռուստադիտողները  պահանջկոտ են, և միայն մասնագիտական զրույցները կարող են երկար և ձանձրալի լինել:

Սոնա Աբրահամյանի խոսքով, այստեղ շատ կարևոր է ոսկե միջինը գտնելու սկզբունքը:

«Լավ բանավեճ ունենալու բանաձևը շատ պարզ է. պետք է կանչել ոչ միայն մասնագետների, այլև այդ խնդիրն ունեցած մարդկանց, որոնք զգացմունքային կապ կստեղծեն հանդիսատեսի և  հաղորդման միջև»,- փաստեց Սոնա Աբրահամյանը:

Անդրադառնալով թեմաների ընտրության խնդրին՝ լրագրող-հաղորդավարները նշեցին, որ այդ հարցում կարևոր պայման է սոցցանցային, մասնավորապես՝ ֆեյսբուքյան իրականությունից դուրս գալը, քանի որ այն մարդիկ, որոնք սոցցանցային ակտիվ կյանք են վարում, որպես կանոն, հեռուստատեսություն չեն դիտում:

«Թեմաների ընտրության հարցում երբեմն մեզ օգնում է մեր լրագրողական հոտառությունը, որի շնորհիվ հաջողվում է ճիշտ կանխագուշակել նաև հաղորդումը եթեր տալու ամենահարմար ժամանակը»,- ասացին հյուրերը:

Քննարկելով սոցցանցերում տարածված ատելության խոսքը, որը չի շրջանցել նաև լրագրող-հաղորդավարներին՝ վերջիններս նշեցին, որ այս դեպքում պետք է վարվել հետևյալ կերպ՝ ուշադրություն չդարձնել անձնական վիրավորանք պարունակող մեկնաբանություններին, կառուցողական քննադատությունն ընդունել որպես ի գիտություն և առաջ շարժվել:

Ներկայացնելով լավ լրագրող դառնալու ուղին՝ հյուրերը մատնանշեցին, որ լավ մասնագետի դառնալու համար միայն մի գաղտնիք կա. մարդ պետք է անմնացորդ սիրի իր մասնագիտությունը և պատրաստ լինի անշահախնդրորեն նվիրվել դրան:

«Լավ վաստակելը, իհարկե, կարևոր գործոն է, բայց ամեն ինչը հենց գումարից սկսելը սխալ մոտեցում է,- նկատեց Աելիտա Չիլինգարյանը,-հավատացեք, զբաղվելով ձեր սիրելի մասնագիտությամբ, դուք վաղ, թե ուշ լավ վաստակելու շատ հնարավորություններ կունենաք»:

Ըստ հյուրերի՝ այսօր աշխատաշուկան առավել, քան երբևէ որակյալ լրագրողների կարիք ունի:

Միջոցառմանը ներկա ուսանողները, ակտիվորեն մասնակցելով հանդիպում-քննարկմանը, լրագրող-հաղորդավարներին ուղղեցին իրենց հուզող հարցերը և ստացան պատասխաններ:

Վերջում հյուրերն ուսանողներին Հանրային հեռուստատեսությունում լրագրողի աշխատանք առաջարկեցին՝ պայմանով, որ ապագա լրագրողները պետք է մասնակացեն «Լրագրողական մարտեր» մրցույթին, ներկայացնեն ստեղծարար աշխատանք և հաղթեն:

Անի Պողոսյան