Մարտ 05, 2019 | 16:52
ՊԵՏՔ Է ԶԱՐԳԱՑՆԵԼ ՄԱՐԴԿԱՅԻՆ ՆԵՐՈՒԺԸ. ՀԱՆԴԻՊՈՒՄ ՆԱԶԱՐԲԱԵՎԻ ՀԱՄԱԼՍԱՐԱՆԻ ՊԱՏՎԻՐԱԿՈՒԹՅԱՆ ՀԵՏ
ԵՊՀ միջազգային համագործակցության վարչությունում այսօր տեղի ունեցավ հանդիպում Նազարբաևի համալսարանի պատվիրակության հետ:
Հանդիպմանը ներկա էին ԵՊՀ միջազգային հարաբերություններ ֆակուլտետի հանրային կառավարման ամբիոնի վարիչ Վահագն Ագլյանը , Նազարբաևի համալսարանի հանրային քաղաքականության բարձրագույն դպրոցի դեկան Վենգ Տատ Հուեյը, պատվիրակության այլ անդամներ:
Միջոցառման սկզբում Հանրային քաղաքականության բարձրագույն դպրոցի դեկան Վենգ Տատ Հուեյը ներկայացրեց դպրոցի ծրագրերը, քննարկվեցին միջբուհական համագործակցության զարգացման հեռանկարները, ուսանողների փոխանակման հնարավորությունները:
Այնուհետև ԵՊՀ գիտական խորհրդի նիստերի դահլիճում Վենգ Տատ Հուեյը Միջազգային հարաբերությունների ֆակուլտետի հանրային կառավարման բաժնի մագիստրատուրայի ուսանողներին ներկայացրեց Նազարբաևի համալսարանի հանրային քաղաքականության բարձրագույն դպրոցի հիմնադրման պատմությունը և անդրադարձավ դպրոցի ծավալած գործունեությանը:
Վենգ Տատ Հուեյի խոսքով, Ղազախստանի նախագահ Նուրսուլթան Նազարբաևի նախաձեռնությամբ 2010 թվականին հիմնադրված դպրոցի հիմնական խնդիրն է բարելավել Ղազախստանում և Կենտրոնական Ասիայում ապրող մարդկանց կյանքի որակը՝ փորձելով զարգացնել հետազոտական ծրագրերը, ուսուցման և դասավանդման գործընթացները, որոնց ուսումնասիրության առանցքային թեմաները վերաբերում են հանրային քաղաքականությանը:
«Մենք ակտիվորեն համագործակցում ենք Եվրոպայում և Ասիայում գտնվող տարբեր համալսարանների հետ: Այդ համալսարանները մեզ համար ռազմավարական նշանակություն ունեցող գործընկերներ են, քանի որ կառավարման ոլորտում մենք շատ ենք արժևորում ենք մեր գործընկերների փորձը»,- նշեց Վենգ Տատ Հուեյը:
Վերջինս նշեց նաև, որ առանձնահատուկ կարևորում է Սինգապուրի հանրային քաղաքականության բարձրագույն դպրոցի հետ համագործակցությունը:
«Կարծում եմ ՝ բոլորիդ է հայտնի «Սինգապուրյան տնտեսական հրաշք» ասվածը: Երբ մենք այդ թեմայով զրուցում ենք սինգապուրցի մեր գործընկերների հետ, վերջիններս նշում են, որ գաղտնիքը շատ պարզ է՝ պարզապես պետք է զարգացնել մարդկային ներուժը, նմանօրինակ դպրոցների հիմնական առաքելությունը հենց դա է»,- պարզաբանեց Վենգ Տատ Հուեյը:
Նազարբաևի համալսարանի հանրային քաղաքականության բարձրագույն դպրոցն առաջարկում է մագիստրոսական, ասպիրանտական, ինչպես նաև հետազոտական ծրագրեր՝ հանրային քաղաքականության և հանրային կառավարման ոլորտներում:
«Մեզ մոտ դասավանդում են իրենց ոլորտում առաջատար և օտարերկրյա լավագույն մասնագետները, մեր կրթական ծրագրերը հնարավորություն են տալիս աշխատաշուկայի համար որակյալ և պահանջարկ ունեցող կադրեր ստեղծելու» ,- նշեց Վենգ Տատ Հուեյը:
Նազարբաևի համալսարանի հանրային քաղաքականության բարձրագույն դպրոցի ծրագրերին կարելի է դիմել մինչև 2019 թ. ապրիլի մեկը:
Բոլոր փաստաթղթերն ընդունվում են առցանց տարբերակով:
Անի Պողոսյան
