ԵՊՀ ՈՍԿԵ ԵՎ ԱՐԾԱԹԵ ՄԵԴԱԼԱԿԻՐՆԵՐԻ ԱՄԱՆՈՐՅԱ ԲԱՐԵՄԱՂԹԱՆՔՆԵՐԸ

ԵՊՀ եվրոպական լեզուների և հաղորդակցության ֆակուլտետի անգլիական բանասիրության ամբիոնի դոցենտ, բ.գ.թ․ Սվետլանա Վարդանյանը, անդրադառնալով նախորդ տարվա ձեռքբերումներին, ընդգծում է ԵՊՀ-ում գործող լաբորատորիաների՝ նորագույն սարքավորումներով հագեցվելու փաստը և հավելում, որ նման լաբորատորիաների առկայությունը նպաստում է գործնականում տեսական գիտելիքների ամրապնդմանը։ Ս. Վարդանյանը ԵՊՀ ուսանողներին մաղթում է, որ գալիք տարում շարունակեն ձեռք բերել խոր գիտելիքներ իրենց ընտրած մասնագիտության բնագավառում՝ բարձր պահելով ԵՊՀ անունը միջազգային ասպարեզում:

Խաղաղության, առողջության և հաջողության տարի մաղթելով` իր ջերմ խոսքն է հղում նաև նույն ամբիոնի դոցենտ, բ.գ.թ. Մարիկա Տոնյանը. «Երկար տարիներ դասավանդելով Երևանի պետական համալսարանում` ես և իմ սերնդակիցները հանդիպել ենք բազմաթիվ երիտասարդների, որոնց հետ ծանոթ երևույթներին նայել ենք նորովի: Մենք միշտ ձգտում ենք գիտելիքից զատ՝ ուսանողներին փոխանցել նաև երջանիկ լինելու գաղտնիքներից մեկը, այն է` սիրել ընտրածդ մասնագիտությունը: Երջանիկ լինենք...»:

ԵՊՀ աշխարհագրության և երկրաբանության ֆակուլտետի ֆիզիկական աշխարհագրության և ջրօդերևութաբանության ամբիոնի դոցենտ Կամո Ալեքսանյանը շնորհավորական իր խոսքում հույս է հայտնում, որ տարին նոր խինդ ու ուրախություն է բերելու:

«Նոր տարին հավատի ու անակնկալների տարի է: Թող այն մայր հայրենիքի և Մայր բուհի համար լինի խաղաղության, վերելքների ու նվաճումների տարի: Թող հայ մարդու սրտում լինի բերկրանք, ուրախություն, իսկ աչքերում՝ ժպիտ ու սեր: Թող 2023 թվականը Հայաստան աշխարհի և Երևանի պետական համալսարանի համար դառնա առաջընթացի և վերելքի տարի»,- ասում է ԵՊՀ դոցենտը:

«Ցանկանում եմ, որ այս տարի ևս ԵՊՀ յուրաքանչյուր աշխատակից և ուսանող բարձր պահի բուհի անունը, քանի որ համալսարանական լինելն իրապես պատվաբեր է և ենթադրում է մեծ պատասխանատվություն: Ուսանողները, որոնք կարևորագույն առաքելությունների կրող են դառնում, լիահույս եմ, որ նպաստելու են մեր երկրի տարբեր բնագավառների զարգացմանը...»,- անմասն չմնալով ամանորյա շնորհավորանքներից` մաղթում է նույն ֆակուլտետի սոցիալ-տնտեսական աշխարհագրության ամբիոնի վարիչ, դոցենտ Վահագն Գրիգորյանը։

Լրացնելով բարեմաղթանքների շարքը՝ ուսանողներին մասնագիտական կայուն զարգացումների տարի է մաղթում նաև ջրաերկրաբանության և ճարտարագիտական երկրաբանության ամբիոնի դոցենտ, տ.գ.թ․ Ժորա Աչոյանը:

Համալսարանի գիտքարտուղարության առաջատար մասնագետ Մարինա Մուրադյանն ասում է. «Լիահույս եմ, որ ինչպես նախորդ տարիներին, այնպես էլ նոր տարում համալսարանը կշարունակի պահպանել իր առաջատար դիրքը մեր երկրի կրթական հաստատությունների շարքում»:

Համալսարանականներին հաջողություն մաղթելով բոլոր նախաձեռնություններում՝ Ա․ Սիսակյանի անվան հեռանկարային հետազոտությունների միջազգային կենտրոնի տնօրեն, ֆ․մ․գ․դ․ Գեորգի Պողոսյանն ընդգծում է. «Գիտության մեջ չկա սյունազարդ ճանապարհ. գիտության փայլուն գագաթներին միայն նա կարող է հասնել, ով, հաղթահարելով դժվարությունները, բարձրանում է նրա քարոտ արահետներով»:

«Նոր տարում սահմանելով մասնագիտական զարգացմանը նպաստող խնդիրներ՝ անշեղորեն ձգտե՛ք դրանց լուծմանը: Ցանկանում եմ՝ 2023 թվականին հատուկ ջանասիրությամբ ու համառությամբ հասնեք Ձեր երազանքների իրականացմանը»,- եզրափակելով գործընկերների ամանորյա բարեմաղթանքները և շնորհավորանքները՝ իր խոսքում նշում է ռադիոֆիզիկայի և էլեկտրոնիկայի ամբիոնի դոցենտ, ֆ․մ․գ․թ․ Վիտալի Քալանթարյանը:

Մարինե Մկրտչյան