Հոկտեմբեր 07, 2022 | 10:34
Կրթություն
Գիտություն
ԵՊՀ-ՈՒՄ Է ՀՐԱՎԻՐՅԱԼ ԴԱՍԱԽՈՍ ՕԼԵԳ ԳԱԲՐԻԵԼՅԱՆԸ
ԵՊՀ-ում դասախոսություն է կարդացել Ղրիմի Վ. Ի. Վերնադսկու անվան համալսարանի փիլիսոփայության ֆակուլտետի դեկան, պրոֆեսոր Օլեգ Գաբրիելյանը։
Այս ուսումնական կիսամյակում Օլեգ Գաբրիելյանը դասախոսելու է «Մտածողության տեխնոլոգիաներ» առարկայի շրջանակում՝ ԵՊՀ փիլիսոփայության և հոգեբանության ֆակուլտետի փիլիսոփայության բաժնի 3-րդ կուրսի ուսանողների, մագիստրանտների և պրոֆեսորադասախոսական կազմի համար: Բացի ուսումնական ծրագրից՝ ֆակուլտետը կազմակերպում է նաև դասախոսություններ պրոֆեսորի հետ:
«Փիլիսոփայության ներկան և հեռանկարները» խորագրով դասախոսության ընթացքում հրավիրյալ բանախոսը ներկայացրել է փիլիսոփայությանն ուղղված արդի մարտահրավերները, փիլիսոփայության՝ իբրև գիտության կարևորությունն ու նշանակությունը արագ զարգացող աշխարհում և մարդկության համար, փիլիսոփայության ոլորտի զարգացման հետագա ուղիները և թեմային առնչվող այլ թիրախային հարցեր:
Դասախոսությունը նախատեսված էր պրոֆեսորադասախոսական կազմի, ուսանողների, հումանիտար և հասարակական ոլորտի մասնագետների համար։
Առաջիկայում անցկացվելու են նաև երկու այլ դասախոսություններ՝ մտածողության տեխնոլոգիաների և արհեստական բանականության ու գիտակցության հիմնահարցերի վերաբերյալ:
Նշենք, որ Օլեգ Գաբրիելյանը ԵՊՀ-ում է «Տրամաբանության, փաստարկման և ճարտասանության բաղադրիչների զարգացումը բուհական կրթական ծրագրերում» ԵՊՀ ներքին դրամաշնորհային ծրագրի շնորհիվ: Նա իր դոկտորական ատենախոսությունը պաշտպանել է ԵՊՀ-ում 1992 թվականին:
