«ՌԵՏՐՈ-ԵՐԵՎԱՆԸ»՝ ԵՊՀ ՄՇԱԿՈՒՅԹԻ ԿԵՆՏՐՈՆՈՒՄ

Հիշեցնենք, որ ԵՊՀ հիմնադրման 100-ամյակին ընդառաջ Մշակույթի կենտրոնը նախաձեռնել էր եռաշար ռետրո համերգ, որի սկիզբն ազդարարվել էր դեռ նախորդ տարի «Ճանաչված ֆիլմերի սիրված երգեր» ռետրո-համերգով: 

Ռետրո համերգի գաղափարը ԵՊՀ ռեկտոր Արամ Սիմոնյանինն է եղել, բեմադրող ռեժիսորը Մշակույթի կենտրոնի տնօրեն Կարինե Դավթյանն է, իսկ իրականացնողները՝ Մշակույթի կենտրոնը:

Միջոցառմանը ներկա էին ԵՊՀ ռեկտոր Արամ Սիմոնյանը, ԵՊՀ գիտական քարտուղար Մենուա Սողոմոնյանը, ԵՊՀ հրատարակչության տնօրեն Կարեն Գրիգորյանը, Ռոմանագերմանական բանասիրության ֆակուլտետի դեկան Սամվել Աբրահամյանը, Անգլիական բանասիրության N 1 ամբիոնի վարիչ Մարգարիտա Ապրեսյանը, կոմպոզիտոր, հայ ջազային երաժիշտ, Հայաստանի Հանրապետության ժողովրդական արտիստ Մարտին Վարդազարյանը, նկարիչ Աշոտ Համբարձումյանը:

Խորհրդանշական ժամացույցը, պատեֆոնը, ռադիոն, ձայնարկիչը, ճանաչված արտահայտությունները հին ու սիրված հայկական ֆիլմերից  ներկաներին տեղափոխել էին ռետրո միջավայր:

Մեկը մյուսին հաջորդող  երգերն ու փոքրիկ բեմադրությունները կերպավորեցին 2800-ամյա Երևանն իր կյանքով ու կենցաղով, վառ ու լուսավոր գույներով:

«Երևանը մենք ենք», «Երևանի սիրուն աղջիկ», «Քեզ բարի լույս, օրդ բարի», «Հե՜յ երգիր Արաքս» և այլ երգերով Երևանը շնչավորվեց, դարձավ առարկայական ու տեսանելի ներկաների համար:

Միջոցառման ընթացքում նկարիչ Աշոտ Համբարձումյանը տեսապատկերի միջոցով ներկայացրեց Երևանի  մշակութային կոթողները, որոնք ցավոք «երկար ճակատագիր» չեն ունեցել. դրանք են՝  Պողոս-Պետրոս եկեղեցին, Խաչատուր Աբովյանի արձանը՝ այժմյան Շառլ Ազնավուրի հրապարակում, «Կազիրյոկը», Կրկեսի շենքը, «Արգիշտի» սրճարանը:

Մարտին Վարդազարյանը  արդեն հնչած երգերին ավելացրեց նորերը. դահլիճը ձայնակցեց կոմպոզիտորին:

Անգին Խաչատրյան