ՀԱՐՑՈՒՄ ՈՒՍԱՆՈՂՆԵՐԻ ՇՐՋԱՆՈՒՄ. ՈՒՍՈՒՄՆԱՍԻՐՎՈՒՄ Է ԿՈՎԿԱՍՈՒՄ, ՂԱԶԱԽՍՏԱՆՈՒՄ ԵՎ ԹՈՒՐՔԻԱՅՈՒՄ ԱԿԱԴԵՄԻԱԿԱՆ ԲԱՐԵՎԱՐՔՈՒԹՅԱՆ ՔԱՂԱՔԱԿԱՆՈՒԹՅՈՒՆԸ

Ուսումնասիրության նպատակն է հետազոտել հաստատություններում ուսանողների կողմից գրագողության և ակադեմիական անազնվության (խարդախության) կանխարգելման և կառավարման նպատակ ունեցող քաղաքականության ու ընթացակարգերի ընկալումը։

Հետազոտությունը համակարգում է Չեխիայի Հանրապետության Բռնո քաղաքի Մենդել համալսարանի դոկտոր Թոմաշ Ֆոլթինեկը և Միացյալ Թագավորության Քովենթրի համալսարանից Այրին Գլենդինինգը։ Ծրագիրը ֆինանսավորվում է Եվրոպայի խորհրդի կողմից։

Հետազոտության նախագիծը վերանայվել և հաստատվել է Քովենթրի համալսարանի հետազոտական էթիկայի ընթացակարգերով։

Այսօր ԵՊՀ-ում տեղի ունեցած խմբային քննարկումը վարում էր Բռնոյի Մենդել համալսարանի ասիստենտ պրոֆեսոր Դիտա Դիաբոլովան, իսկ մասնակից ուսանողները ներկայացնում էին համալսարանի տարբեր ֆակուլտետներ:

Քննարկման ընթացքում ուսանողները պատմեցին իրենց փորձառության մասին և հնչեցրին կարծիքներ՝ կապված գրագողության, ակադեմիական անազնվության և ուսանողական հարցումների վերաբերյալ՝ փաստելով, որ բոլորն էլ առնչվել են այդ երևույթների հետ:

Ուսանողները քննարկեցին նաև, թե ինչպես են տեսնում խնդիրների լուծումները՝ շեշտելով, որ միայն ուսանողը չի կարող ոչինչ փոխել. պետք է երկկողմանի համագործակցություն:

Հանդիպման ավարտին Դիտա Դիաբոլովան ասաց, որ հիացած է ուսանողների ներգրավածությամբ. «Զարմացած եմ, որ այսքան ազնիվ եք, չեք կաշկանդվում և ներկայացնում եք այն ամենը, ինչ կա»:

Տեղեկացնենք, որ հետազոտության արդյունքները վերլուծվելու և ներկայացվելու են ծրագրի հաշվետվության ձևով։ Արդյունքները կարող են ներկայացվել գիտական համաժողովներին և հրապարակվել գիտական ամսագրերում։

Քնար Միսակյան