«ԱՇԽԱՏԱՇՈՒԿԱՅՈՒՄ «ԿԻՐԱՌԱԿԱՆ ՎԻՃԱԿԱԳՐՈՒԹՅՈՒՆ ԵՎ ՏՎՅԱԼՆԵՐԻ ԳԻՏՈՒԹՅՈՒՆ» ԿՐԹԱԿԱՆ ԾՐԱԳԻՐԸ ՍԵՐՏԱԾ ՄԱՍՆԱԳԵՏՆԵՐԻ ՄԵԾ ՊԱՀԱՆՋԱՐԿ ԿԱ». ԵՊՀ ԴՈԿՏՈՐ ՎԻԿՏՈՐ ՕՀԱՆՅԱՆ

Հավանականությունների տեսության և մաթեմատիկական վիճակագրության ամբիոնի վարիչ, ֆիզմաթ. գիտ. դոկտոր, պրոֆեսոր Վիկտոր Օհանյանն աշակերտներին ծանոթացրեց «Կիրառական վիճակագրություն և տվյալների գիտություն» բակալավրի կրթական նոր ծրագրին:

Նա նշեց, որ 2019-2020 ուստարում ԵՊՀ-ի մաթեմատիկայի և մեխանիկայի ֆակուլտետի բակալավրում գործելու է «Կիրառական վիճակագրություն և տվյալների գիտություն» բակալավրի կրթական նոր ծրագիրը, որը միավորում է վիճակագրական մոդելավորման, մեքենայական ուսուցման և համակարգչային գիտությունների հիմունքները:

Վ. Օհանյանի խոսքով, ծրագրի խնդիրն է սովորեցնել ուսանողներին օգտագործել մաթեմատիկական մեթոդներն և համակարգչային տեխնոլոգիաները կիրառական խնդիրներում:

Ըստ բանախոսի, կիրառական վիճակագրությունը և տվյալների գիտությունը մեթոդների և գաղափարների համախմբություն են, որը թույլ է տալիս իմաստավորելու ահռելի ծավալով տվյալներ. «Դրա հիմքում ընկած են մաթեմատիկական վիճակագրության կիրառումը, մեքենայական ուսուցումը»:

Վիկտոր Օհանյանի խոսքով, այսօր աշխատաշուկայում «Կիրառական վիճակագրություն և տվյալների գիտություն» ծրագիրը սերտած մասնագետների մեծ պահանջարկ կա. «Այսօր մի շարք ծրագրավորման ընկերություններում պահանջում են կիրառական վիճակագրության տվյալների մասին իմացություն»,- հավելեց նա:  

Այս ծրագրի շրջանավարտները կկարողանան ազատ կողմնորոշվել վիճակագրական տվյալների մշակման ժամանակակից մոտեցումների և ալգորիթմների մեջ՝ ապահովելով առաջատար դիրքեր հետագա կրթության համար արդի վիճակագրության և տվյալագիտության բնագավառում:  

Հավանականությունների տեսության և մաթեմատիկական վիճակագրության ամբիոնի ավագ լաբորանտ Հռիփսիմե Հարությունյանն աշակերտներին ներկայացրեց հավանականության դասական սահմանումը և պատահական մեծության հասկացությունը, ինչպես նաև վիճակագրական տվյալների բնութագրիչները:

Կարևորելով բուհ-դպրոց համագործակցությունը՝ «Հերացի» ավագ դպրոցի ուսուցչուհի Լենա Ղասաբյանը նշեց, որ աշակերտները, գալով բուհ, ավելի խորքային տեղեկատվություն են ստանում համալսարանում իրականացվող կրթական ծրագրերի մասին: «Մեր դպրոցում կան տարբեր օլիմպիադաներին մասնակցող շատ աշակերտներ, որոնց շատ հետաքրքրել են մասնավորապես կիրառական վիճակագրության մասին ավելի խորքային տեղեկություններ»:

Նշենք, որ աշակերտների հյուրընկալությունները ԵՊՀ շարունակական բնույթ են կրելու, ինչի նպատակն է նպաստել ավարտական դասարանների աշակերտների մասնագիտական կողմնորոշմանը և վերջիններիս ուղղորդել դեպի ԵՊՀ:

Նադեժդա Տեր-Աբրահամյան