ԵՐԿՐՆԵՐԻ ՀԱՂՈՐԴԱԿՑՄԱՆ ՀԱՅԵՑԱԿԱՐԳԵՐԻ ՎԵՐԱԲԵՐՅԱԼ ԴԱՍԱԽՈՍՈՒԹՅՈՒՆ ԵՊՀ-ՈՒՄ

Հետազոտական ինստիտուտի գիտական աշխատանքների գծով փոխտնօրեն Վ․ Կոմլևան սեմինար անցկացրեց ԵՊՀ մագիստրանտների և երիտասարդ գիտնականների հետ։ Սեմինարի թեման առնչվում էր ինստիտուտի կատարած հետազոտությունների արդյունքում Հայաստանի հաղորդակցության հայեցակարգերի իմացաբանական ներուժի արդի վիճակի գնահատականին։

Այնուհետև պրոֆեսոր Կոմլևան ԵՊՀ առաջատար գիտնականներին և փորձագետներին առաջարկեց համագործակցել ինստիտուտի հետ, անցկացնել քննարկումներ պետությունների դիվանագիտական հարաբերությունների և տարաբնույթ այլ հարցերի շուրջ։

Դասախոսությանը ներկա էին ԵՊՀ միջազգային հարաբերությունների, սոցիոլոգիայի, արևելագիտության ֆակուլտետների և Հայագիտական հետազոտությունների ինստիտուտի առաջատար մասնագետները և այլ հյուրեր։ Վ․ Կոմլևան քննարկումներ անցկացրեց նաև ԵՊՀ միջազգային համագործակցության վարչության պետ, պրոֆեսոր Ալ․ Մարգարովի, միջազգային հարաբերությունների ֆակուլտետի դեկան Գ․ Պետրոսյանի և Հայագիտական հետազոտությունների ինստիտուտի տնօրեն, դոցենտ Վ․ Պետրոսյանի հետ։

Նշենք, որ ինստիտուտը 2021 թվականին կատարել է ՌԴ հարևան 14 երկրների հետ բարեկամության վարկանիշի ուսումնասիրություն և արդյունքները հանձնել հասարակության և տարբեր երկրների մասնագետների դատին։ Ըստ վարկանիշային ցուցակի՝ առաջատար դիրքում են Ղազախստանը, Բելառուսը և այլ երկրներ։ Ավարտվել է նաև 2022 թ․ հետազոտությունը, որի արդյունքները կհրապարակվեն 2023 թ․ հունվարին։

Հիշեցնենք, որ Հաղորդակցության զարգացման ազգային հետազոտական ինստիտուտի (Մոսկվա) հետ համագործակցության շրջանակում վերջերս ԵՊՀ-ում կազմակերպվել էր կլոր սեղան-քննարկում։