Ֆարմքիմիայի և ֆարմակագնոզիայի ամբիոն

Ֆարմքիմիայի և ֆարմակոգնոզիայի ամբիոնը ստեղծվել է 2015 թ. ԵՊՀ դեղագիտության և քիմիայի ֆակուլտետում 1998 թվականից գործող դեղագործական քիմիայի ամբիոնի հենքի վրա: 2017 թ․ ֆարմքիմիայի և ֆարմակոգնոզիայի ամբիոնը ներառվել է նորաստեղծ ֆարմացիայի ինստիտուտի կազմում:

Ամբիոնի ուսումնական լաբորատորիաները համալրված են հետազոտական և վերլուծական ժամանակակից սարքավորումներով:

Ամբիոնի աշխատակիցները ներգրավված են միջազգային ու տեղական դրամաշնորհային ծրագրերում, հեղինակ են ուսումնամեթոդական ձեռնարկների, մենագրությունների, գիտական հոդվածների, որոնք մեծ մասամբ տպագրվում են բարձր ազդեցության գործակից ունեցող պարբերականներում։

Ֆարմքիմիայի և ֆարմակոգնոզիայի ամբիոնին կից գործում է ֆարմացիայի ինստիտուտի գիտահետազոտական կենտրոնը, որտեղ կատարվում են հետազոտություններ՝ ալիֆատիկ, արոմատիկ և հետերոցիկլիկ տեղակալված, օպտիկապես ակտիվ ոչ սպիտակուցային (S)- և (R)-α-ամինաթթուների ասիմետրիկ բիոմիմետիկ սինթեզի ուղղությամբ: Դեղերի որակի վերահսկման հետազոտություններն անցկացվում են դեղերի որակի հսկման և մոնիթորինգի գիտաուսումնական կենտրոնի լաբորատորիայում: Այդ կենտրոնի հենքի վրա 2021 թվականից ինստիտուտում գործում է ամբիոնի առաջարկած «Դեղերի որակի վերահսկում» մագիստրոսական ծրագիրը: