Մեխանիկայի ամբիոն

ԵՊՀ ֆիզիկամաթեմատիկական և մեխանիկամաթեմատիկական ֆակուլտետներում մեխանիկայի բաժինը գործում էր 1950-ականներից՝ Տեսական մեխանիկայի և Առաձգականության ու պլաստիկության տեսության (1978-ից՝ Հոծ միջավայրի մեխանիկայի) ամբիոններով։ Ամբիոնների կազմավորման գործում կարևոր էր մեխանիկայի հայաստանյան դպրոցի հիմնադիրներ, ԵՊՀ նախկին ռեկտորներ, ակադեմիկոսներ Նագուշ Հարությունյանի և Սերգեյ Համբարձումյանի ներդրումը։

1988 թ. հիմնադրվեց Մեխանիկայի ֆակուլտետը, որի դեկանն էր ակադեմիկոս Վլադիմիր Սարգսյանը։ 2007 թ. վերակազմավորվեց Մաթեմատիկայի և մեխանիկայի ֆակուլտետը, որտեղ և գործում է Մեխանիկայի ամբիոնը:

Մեխանիկայի տարբեր ուղղությունների բուռն զարգացմանը մեծապես նպաստել են ամբիոնների դասախոսները, գիտաշխատողները, շրջանավարտները։

Ամբիոնը բակալավրիատում իրականացնում է «Մեխանիկա» կրթական ծրագիրը, իսկ մագիստրատուրայում՝ «Մեխանիկա և կիրառական մաթեմատիկա» կրթական ծրագիրը։ Ամբիոնի կազմում գործում է ուսումնական լաբորատորիա։

Մեխանիկայի ամբիոնի ուսումնական պլաններն ընդգրկում են մեխանիկայի և մաթեմատիկայի ժամանակակից դասընթացներ տեսական մեխանիկայի, հոծ միջավայրի մեխանիկայի, առաձգականության տեսության, հիդրոաերոմեխանիկայի, վարիացիոն հաշվի և օպտիմիզացիայի, ղեկավարման տեսության, մաթեմատիկական ֆիզիկայի, հաշվողական մաթեմատիկայի, ծրագրավորման արդի մեթոդների և տեխնոլոգիաների բնագավառներում։

Բակալավրիատում և մագիստրատուրայում ուսանողներին դասավանդվում են հատուկ մասնագիտական դասընթացներ դեֆորմացվող պինդ մարմնի մեխանիկայի, մեխանիկական համակարգերի օպտիմալ նախագծման, շարժումների ղեկավարման, կայունացման, մոդելավորման ուղղություններով։ 

Լավագույն շրջանավարտները հնարավորություն ունեն ուսումնառությունը շարունակելու ասպիրանտուրայում՝ «Դեֆորմացվող պինդ մարմնի մեխանիկա» և «Տեսական մեխանիկա» մասնագիտություններով:

Մեխանիկայի ամբիոնի գիտահետազոտական ուղղություններն են՝ դեֆորմացվող միջավայրերի և ֆիզիկամեխանիկական դաշտերի փոխազդեցության խնդիրները, առաձգականության մաթեմատիկական տեսության կոնտակտային և խառը խնդիրները, ալիքների տարածումը և դիֆրակցիան՝ առաձգական և էլեկտրաառաձգական միջավայրերում, դիֆերենցիալ խաղեր շատ նպատակային բազմությունների դեպքում, կառուցվածքային տարրերի օպտիմալ նախագծման և համակարգերի շարժման կայունության և կայունացման ուսումնասիրության խնդիրները, դինամիկական համակարգերի և պրոցեսների ղեկավարումն ու դիտումը։ Հետազոտություններից ստացվող հիմնական արդյունքներն ունեն կիրառական նշանակություն։ Կատարվող գիտահետազոտական աշխատանքներում ներգրավվում են նաև ուսանողները:

Ամբիոնում անցկացվում են գիտական և ուսումնական սեմինարներ: Ամբիոնի դասախոսները և գիտաշխատողները, մագիստրոսներն ու ասպիրանտները իրենց հետազոտությունների մասին զեկուցումներով են հանդես գալիս գիտական սեմինարներում և միջազգային գիտաժողովներում: Շատ հաճախ ամբիոնը կազմակերպում է մեխանիկայի արդի հարցեր և հիմնախնդիրներ քննարկող միջազգային գիտաժողովներ, որոնց մասնակցում են նաև ուսանողները և ասպիրանտները:

Ուսանողները հետազոտական, դիպլոմային աշխատանքներ և մագիստրոսական թեզեր են պատրաստում ամբիոնի գիտական և կրթական ծրագրերին և ուղղություններին համապատասխան։