![](/sites/default/files/styles/large_half_text/public/2024-03/1_1.jpg?itok=WlKmU94b)
ԵՊՀ պատմության ֆակուլտետում ի.գ.թ., պրոֆեսոր Արման Թաթոյանը ներկայացրեց «Ադրբեջանի թշնամական քաղաքականությունը՝ ընդդեմ հայկական ինքնության» խորագրով դասախոսություն, որին ներկա էին ԵՊՀ պատմության ֆակուլտետի պրոֆեսորադասախոսական կազմի ներկայացուցիչներ և ուսանողներ։
Ա. Թաթոյանը նշեց, որ խմբով պարբերաբար այցելում են սահմանային բնակավայրեր, մասնավորապես՝ Սյունիքի և Գեղարքունիքի մարզեր, և արձանագրում մարդու իրավունքների խախտման բոլոր հնարավոր դեպքերը, որոնք կարևոր են սահմանազատման (դելիմիտացիա) և սահմանագծման (դեմարկացիա) գործընթացներում։
«Գոյություն ունեն դելիմիտացիայի և դեմարկացիայի միջազգային կանոններ, որոնց համաձայն պետք է հաշվի առնել ոչ միայն տեղագրական քարտեզները, այլ նաև կադաստրային, անտառային, գեոդեզիական և այլ քարտեզներ, ինչպես նաև մարդկանց ավանդույթները։ Միջազգային չափանիշն այն է, որ գործընթացների արդյունքում չպետք է խաթարվի մարդկանց բնականոն կյանքը»,- շեշտեց բանախոսը։
Խոսելով ադրբեջանական թշնամական քաղաքականության մասին՝ Ա. Թաթոյանն ընդգծեց. «Ադրբեջանը խաղաղությունը դարձրել է շղարշ արտաքին աշխարհի համար, բայց իրականում զարգացնում է թշնամանքի, ատելության քաղաքականություն։ Միայն Ապրիլյան պատերազմին վերաբերող 600 խոշտանգման լուսանկար և տեսանյութ ունենք։ Ըստ այդ տեսանյութերի թարգմանությունների՝ ադրբեջանցի զինվորները ոգեշնչված էին Ադրբեջանի իշխանությունների հայտարարություններով։ Նրանք բաց դեմքերով էին՝ չվախենալով պատասխանատվությունից, իսկ նպատակն էր լայնորեն ահ ու սարսափ տարածել հայ հասարակության շրջանում»։
![](/sites/default/files/styles/large_half_text/public/2024-03/2.jpg?itok=PJuSKbQ8)
Անդրադառնալով հայկական ինքնության դեմ ադրբեջանական թշնամական քաղաքականությանն ու դրա դեմ պայքարելու մեխանիզմներին և գործիքակազմին՝ Ա. Թաթոյանն ասաց. «Պետք է շարունակաբար արձանագրել և վեր հանել հայատյացության դեպքերը, ինչը, սակայն, ինքնանպատակ չպետք է լինի։ Այն պետք է դառնա պետական քաղաքականության միասնական շղթայի մաս»։
Նշենք, որ հանդիպման ավարտին ուսանողները հնարավորություն ունեցան իրենց հետաքրքրող հարցերն ուղղելու բանախոսին: