ԵՊՀ պատմության ֆակուլտետում հյուրընկալվել էր Վարշավայի համալսարանի միջերկրածովյան հնագիտության լեհական կենտրոնի պատվիրակությունը՝ կենտրոնի տնօրեն Արթուր Օբլուսկի գլխավորությամբ։ Պատվիրակության կազմում էր նաև կենտրոնի Մերձավոր Արևելքի հնագիտության բաժնի վարիչ Մաթեուշ Իսկրան։ Այցի շրջանակում քննարկվեցին գիտական համագործակցության հեռանկարները, ինչպես նաև հնագիտական հետազոտությունների համատեղ նախագծերի իրականացման հնարավորությունները։

Կենտրոնը զբաղվում է հնագիտական հետազոտություններով Միջերկրածովյան և Մերձավոր Արևելքի տարածաշրջաններում՝ կատարելով հնագիտական պեղումներ և գիտահետազոտական տարբեր նախագծեր։ Կենտրոնի մասնագետները ներգրավված են հնագիտական տարբեր արշավախմբերում՝ գործունեություն ծավալելով Եգիպտոսում, Մարոկկոյում, Սուդանում և տարածաշրջանի այլ երկրներում։
Այցի շրջանակում քննարկվեց ԵՊՀ պատմության ֆակուլտետի ուսանողների մասնակցության հնարավորությունները ինչպես կենտրոնի հայաստանյան ծրագրերին, այնպես էլ միջազգային հնագիտական աշխատանքներին։ Ձեռք բերված համաձայնությամբ՝ ֆակուլտետի ուսանողներն արդեն մայիսից կարող են մասնակցել Արգիշտիխինիլիում (Արմավիր) և Զվարթնոցում կատարվող աշխատանքներին՝ տեսական գիտելիքները կիրառելով դաշտային պայմաններում։
Արթուր Օբլուսկին նաև նշեց, որ այն ուսանողները, որոնք հետաքրքրված են Ալեքսանդրիայի և այլ հնագիտական պեղումներով, կարող են ներգրավվել այդ ծրագրերում՝ աշխատելով միջազգային արշավախմբերի կազմում։
Հանդիպման շրջանակում քննարկվեց հեռավար դասախոսությունների անցկացման հարցը, և Վարշավայի համալսարանը պատրաստակամություն հայտնեց կազմակերպելու դասընթացներ ԵՊՀ պատմության ֆակուլտետի ուսանողների համար՝ նպաստելով նրանց մասնագիտական գիտելիքների խորացմանը միջազգային հնագիտության ոլորտում։
Վարշավայի համալսարանի ներկայացուցիչների այցը նոր հնարավորություն է ստեղծում ԵՊՀ պատմության ֆակուլտետի ուսանողների և հետազոտողների համար՝ ներգրավվելու միջազգային ծրագրերում, ընդլայնելու գիտական կապերը և հարստացնելու իրենց մասնագիտական փորձառությունը։