Կովկասագիտություն
Բակալավրի կրթական ծրագիր
Ծրագրի մասին
Կովկասագիտության՝ որպես կայացած և հարուստ ավանդույթներ ունեցող գիտակարգի կարևորությունը ինչպես զուտ գիտական, այնպես էլ քաղաքական, կիրառական, քաղաքագիտական ու աշխարհաքաղաքական դիտանկյուններից նշանավորվեց 2012 թվականից ԵՊՀ պատմության ֆակուլտետում «Կովկասագիտության» բաժնի ձևավորմամբ։
Բաժնի հիմնադրման, կովկասագիտական կրթական ծրագրերի ստեղծման, դասընթացների մշակման գործում վճռական դեր են ունեցել Հայաստանի հարակից երկրների պատմության ամբիոնի երջանկահիշատակ վարիչ, պրոֆեսոր Հայրապետ Մարգարյանը, անվանի կովկասագետներ, պրոֆեսորներ Պարույր Մուրադյանը, Պավել Չոբանյանը և այլք։
Ծրագրի նպատակը
«Կովկասագիտություն» կրթական ծրագրի ստեղծման նպատակն է պատրաստել հայագիտական-կովկասագիտական հիմնարար գիտելիքներ ունեցող մասնագետներ, որոնք մրցունակ կլինեն ինչպես հայկական, այնպես էլ միջազգային գիտական ասպարեզներում։ «Կովկասագիտություն» կրթական ծրագրում դասավանդվում են ինչպես ընդհանուր, այնպես էլ նեղ մասնագիտական (կովկասագիտական) դասընթացներ, օտար լեզուներ (մեկ եվրոպական լեզու, վրացերեն, ադրբեջաներեն՝ խորացված ուսուցմամբ), պատրաստվում են նեղ մասնագիտացում ունեցող (Վրաստանի, Ադրբեջանի, Հյուսիսային Կովկասի պատմության կամ կոնկրետ պատմական ժամանակահատվածների) մասնագետներ։
Առավելությունները
Ներկայում ամբիոնում ծավալվող աշխատանքներն ընդգրկում են տարածաշրջանի երկրների և ժողովուրդների հին, միջնադարյան, նոր և արդի ժամանակների էթնոքաղաքական, կրոնամշակութային զարգացումների, փոխառնչությունների, կովկասյան ժողովուրդների պատմական ժառանգության գնահատումն ու ռազմավարական հետազոտությունները։
Ամբիոնում աշխատում են հանրապետության ճանաչված և առաջատար մասնագետներ, որոնք պարբերաբար անցնում են վերապատրաստումներ, ներգրավված են արտաքին և ներքին դրամաշնորհային ծրագրերում, ակտիվորեն մասնակցում են և զեկուցումներով հանդես գալիս միջազգային գիտաժողովներում։ Ամբիոնի աշխատանքներում ներգրավված են ՀՀ ԳԱԱ արևելագիտության և պատմության ինստիտուտների գիտնական-հետազոտողները, ինչն առավել արդյունավետ է դարձնում ամբիոնի գործունեությունը։ Ամբիոնի գիտնականները հեղինակել են ուսումնամեթոդական ձեռնարկներ, մենագրություններ, դպրոցական դասագրքեր, գիտական հոդվածներ, որոնք տպագրվում են բարձր ազդեցության գործակից ունեցող պարբերականներում։
Կարիերայի հնարավորությունները
Ավելի քան տասը տարի գործող «Կովկասագիտություն» կրթական ծրագրի շրջանավարտները (ադրբեջանագետներ, վրացագետներ) աշխատում են հանրապետության հասարակական-քաղաքական կյանքի տարբեր բնագավառներում։
«Կովկասագիտություն» կրթական ծրագրի շրջանավարտները հայագիտական և կովկասագիտական կրթակարգի հիման վրա աշխատաշուկայում հնարավորություն ունեն աշխատելու ինչպես կրթական, գիտական հաստատություններում, այնպես էլ ՀՀ արտաքին գործերի նախարարությունում դիվանագիտական ներկայացուցչություններում, պաշտպանության նախարարության համակարգում, ազգային անվտանգության ծառայությունում և այլ կառույցներում։
