Աստվածաբանություն

Աստվածաբանությունը, պատմական ու մշակութային անընդհատ փոփոխվող պայմաններում շարունակաբար զարգանալով, ժամանակի ընթացքում վերածվել է իր աղբյուրները, մեթոդներն ու հետազոտական ավանդույթներն ունեցող գիտության: Աստվածաբանությունը գիտելիքի համակարգ է, հումանիտար գիտությունների մի ամբողջ ճյուղ (կարելի է ասել՝ ընդլայնված մասնագիտություն), որն ուսումնասիրության լայն շրջանական՝ վարդապետության պատմություն, եկեղեցական իրավունք, միջեկեղեցական հարաբերություններ, մատենագրություն, Աստվածաշնչի ներածություն և մեկնություն, տոմարագիտություն, ձեռագրագիտություն, կրոնական արվեստ և հնագիտություն, հայրախոսական գրականություն, կենսաբժշկագիտական էթիկա և այլն:

Աստվածաբանությունն անմիջականորեն կապված է նաև ժամանակակից պետականության ստեղծման հետ, քանի որ այսօր պետությունների զարգացումը, որը հիմնված է ոչ միայն գիտության, այլև կրոնի և կրոնական փոխհարաբերությունների վրա, դիտարկվում է ժամանակակից աշխարհի բազմաբևեռ համակարգի պայմաններում։ Եվ այն մարտահրավերները, որոնք արդի աշխարհը դնում է մարդկության առաջ, ստիպում է հատուկ ուշադրություն դարձնել քաղաքակրթությունների պատմությանը, որը անմիջականորեն կապված է հավատքի հետ։ Պատմական իրադարձությունները վկայում են աշխարհի հոգևոր բարեկեցության կարևորության մասին։

Ընդունելության պահանջները

Աստվածաբանության ֆակուլտետ ընդունվելու համար դիմորդը հանձնում է մրցութային երկու քննություն «Հայոց պատմություն» և «Հայոց լեզու» կամ «Օտար լեզու» առարկաներից:

Ծրագրի նպատակը

Ստանալով բարձրագույն մասնագիտական կրթություն՝ ուսանողները ձեռք են բերում «Աստվածաբանություն» մասնագիտությամբ հիմնարար գիտելիքներ, գիտահետազոտական աշխատանք կատարելու կարողություններ և հմտություններ:

«Աստվածաբանություն» կրթական ծրագրում ուսանողները սովորում են 4 տարի՝ ստանալով ինչպես ընդհանուր, այնպես էլ մասնագիտական ու նեղ մասնագիտական գիտելիքներ:

Ծրագրի շրջանակում ուսանողները ձեռք են բերում աստվածաբանության տեսական, պատմական և կիրառական ժառանգությունը համադրելու, ինչպես նաև աստվածաբանական մտքի ներկա վիճակը վերլուծելու հմտություններ:

Առավելությունները

Աստվածաբանության ֆակուլտետի «Աստվածաբանություն» կրթական ծրագիրը միակ կրթական ծրագիրն է հանրապետությունում գործող բարձրագույն ուսումնական հաստատությունների շարքում: Ծրագիրը բաղկացած է ընդհանուր, մասնագիտական պարտադիր և կամընտրական դասընթացներից: Մասնագիտական պարտադիր և կամընտրական դասընթացների բովանդակությունը վերաբերում է Հին և Նոր Կտակարանների ներածությանը, Աստվածաշնչի գրքերի մեկնողական և մեկնաբանական դպրոցներին, եկեղեցու հայրերի մատենագրական ժառանգությանը, կանոնագիտության և տոմարագիտության խնդիրներին, մեթոդներին, ուղղություններին ու դրանց կիրառությանը, տոնածիսական համակարգի ներմուծմանն ու կիրառմանը և աստվածաբանական վերլուծությանը, ինչպես նաև վարդապետական աստվածաբանության, բարոյական աստվածաբանության, Արևմտյան և Հայ եկեղեցիների փոխհարաբերություններին էկումենիզմի դարաշրջանում:

Կարիերայի հնարավորությունները 

Աստվածաբանության ֆակուլտետի ուսանողները կարող են աշխատանքի անցնել դպրոցներում և բարձրագույն ուսումնական հաստատություններում, գիտահետազոտական ինստիտուտներում, եկեղեցական հաստատություններում: 
Ծրագրի շրջանավարտները հնարավորություն ունեն շարունակելու ուսումը ԵՊՀ աստվածաբանության ֆակուլտետի, հարակից մասնագիտություններով կրթական ծրագրեր իրականացնող բարձրագույն մասնագիտական այլ հաստատությունների մագիստրատուրայում: