Վարդապետական աստվածաբանություն

ԵՊՀ աստվածաբանության ֆակուլտետն իրականացնում է «Վարդապետական աստվածաբանություն» կրթական ծրագիրը:

Ընդունելության պահանջները

Դիմորդների ընդունելությունը կատարվում է ԵՊՀ մագիստրատուրայի ընդունելության կարգի համաձայն՝ առանց ընդունելության քննության, մրցութային կարգով՝ ատեստավորման գնահատականի կամ միջին որակական գնահատականի (ՄՈԳ) հաշվառմամբ:

Ծրագրի նպատակը

«Վարդապետական աստվածաբանություն» կրթական ծրագրի նպատակն է պատրաստել վարդապետական աստվածաբանության ոլորտի որակյալ մասնագետներ՝ ստեղծելով նպաստավոր պայմաններ ուսումնառության, դասավանդման և գնահատման գործընթացների էական բարելավման համար՝ հնարավորություն տալով ուսանողին զբաղվելու գիտական գործունեությամբ:

Առավելությունները

Մագիստրատուրայի ուսումնական ծրագրում ընդգրկված առարկաները գլխավորաբար ներկայացնում են արդի գիտական ձեռքբերումների խտացված պատկերը: Այստեղ կարևոր տեղ է զբաղեցնում պատմական աստվածաբանությունը: Ըստ այսմ՝ խորությամբ և համակողմանի դասավանդվում են «Հայ եկեղեցու դավանաբանություն», «Խորհրդապաշտական աստվածաբանություն», «Աստվածաբանության արդի հիմնախնդիրներ», «Հայոց տոնական համակարգը», «Կանոնագիրք հայոց», «Հայ քրիստոնեական մշակույթ» և այլ առարկաներ, որոնք չեն սահմանափակվում լոկ տեսական-ուսուցողական շրջանակի մեջ. դրանք ունեն գործնական նշանակություն, որովհետև ըստ մագիստրանտի՝ գիտական նախասիրության ու հմտության այդ դասընթացների մի շարք կողմեր, որոնք տակավին կարոտ են առավել խոր հետազոտության, հնարավորություն ունեն դառնալու ատենախոսության մասնավոր նյութ, ինչը հնարավորություն կտա նրան լուրջ հայտ ներկայացնելու՝ գիտական ասպարեզ մտնելու և ունենալու գիտահետազոտական կամ մանկավարժական հաստատության մեջ աշխատելու հստակ հեռանկար:

Կարիերայի հնարավորությունները

Ծրագրի հաջող ավարտին շրջանավարտն ունակ կլինի համեմատելու հայ և ընդհանրական եկեղեցիների դավանաբանական ձևակերպումները, ընդգծել տարբերությունները, տարբերակելու և վերլուծելու հայ և ընդհանրական եկեղեցիների հայրերի, աստվածաբանների գրական ժառանգությունը, լուսաբանելու մատենագրական ժառանգության մեջ կիրառվող տոմարական հաշվումների հիմնական առանձնահատկությունները, կատարելու տոմարական ճիշտ հաշվարկներ, վերլուծելու Հին ու Նոր Կտակարանների գրքերը, զատորոշելու պարականոն, երկրորդականոն գրքերը:

Մագիստրոսական ծրագրի շրջանավարտները հնարավորություն ունեն հանդես գալու իբրև փորձագետ աստվածաբանության ոլորտին առնչվող հարցերում: