Տնտեսագիտության մեջ մաթեմատիկական մոդելավորման ամբիոն

Տնտեսագիտության մեջ մաթեմատիկական մոդելավորման ամբիոնը (նախկինում՝ տնտեսական կիբեռնետիկայի ամբիոն) հիմնադրվել է 1965 թ․: Ամբիոնը ղեկավարել են տնտեսագիտության թեկնածու, դոցենտ Վ. Կարաբեկովը, տնտեսագիտության դոկտոր, պրոֆեսոր Յու. Մովսիսյանը, տնտեսագիտության դոկտոր, պրոֆեսոր Վ. Թորոյանը:

2003 թվականից ամբիոնը ղեկավարում է տեխնիկական գիտությունների դոկտոր, պրոֆեսոր Արամ Առաքելյանը:

Տնտեսագիտության մեջ մաթեմատիկական մոդելավորման ամբիոնն իրականացնում է մագիստրոսական երկու ծրագիր՝ «Մոդելավորումը ֆինանսատնտեսական համակարգերում» և «Տվյալների գիտությունը բիզնեսում»։

«Մոդելավորումը ֆինանսատնտեսական համակարգերում» ծրագիրն իրականացվում է ՀՀ կենտրոնական բանկի հետ համատեղ։

«Տվյալների գիտությունը բիզնեսում» մագիստրոսական ծրագիրն իրականացվում է Սան Խոսեի պետական համալսարանի (ԱՄՆ), «Ձեռնարկությունների ինկուբատոր» հիմնադրամի, Ինովացիոն լուծումների և տեխնոլոգիաների կենտրոնի հետ համատեղ և «PMI Science»-ի աջակցությամբ: Մագիստրոսական ծրագրի ուսումնական ամբողջ ծրագիրը լիովին ներդաշնակեցված է Սան Խոսեի պետական համալսարանի «Տվյալների վերլուծություն» մագիստրոսական ծրագրի հետ: Ըստ ձեռք բերված համաձայնության՝ ծրագրի մինչև հինգ ուսանողներ երկփուլ ընտրությունը հաղթահարելու դեպքում ուսման երկրորդ տարին, ԵՊՀ-ում իրենց ստացած կրեդիտները փոխանցելով ՍԽՊՀ, հնարավորություն ունեն շարունակելու կրթությունը ՍԽՊՀ «Տվյալների վերլուծություն» մագիստրոսական ծրագրում և բարեհաջող ավարտելուց հետո ստանալու տվյալագետի կրկնակի դիպլոմ։

Տնտեսագիտության մեջ մաթեմատիկական մոդելավորման ամբիոնի շրջանավարտները բարձրորակ տնտեսագետ-վերլուծաբաններ են, որոնք ունակ են աշխատելու տնտեսության բոլոր ոլորտներում: Նրանք կարևոր դերակատարում են ունեցել ինչպես Խորհրդային, այնպես էլ նորանկախ Հայաստանի տնտեսության զարգացման և կառավարման հիմնախնդիրների մշակման ու լուծման գործում:

Ամբիոնի գիտահետազոտական գործունեության հիմնական ուղղություններից են միգրացիոն հոսքերի ուսումնասիրության, շրջակա միջավայրի տնտեսագիտության, կազմակերպության տնտեսագիտության, ՀՀ-ում տարածքային համաչափ զարգացման հիմնախնդիրները։