Ընդհանուր և բժշկական կենսաքիմիա

Մագիստրոսական ծրագիրն ստացել է միջազգային հավատարմագրում 2023 թ. դեկտեմբերին: Ուսուցման ձևը առկա է, ուսումնառության տևողությունը՝ 2 տարի,  2024/25 ուստարվա վարձը՝ 550 000 ՀՀ դրամ, շնորհվող որակավորումը՝ կենսաբանության մագիստրոս։

Ընդունելության պահանջները

Ծրագրի դիմորդը պետք է ունենա բակալավրի դիպլոմ բնագիտական որևէ մասնագիտությամբ և հանձնի քննություն «Ընդհանուր կենսաբանություն և կենսաքիմիա» առարկայից:

Ընդունելությունը կատարվում է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Հարցաշարը՝ «Ընդունելություն» բաժնում։

Ծրագրի նպատակը

Ծրագիրը նպատակն է պատրաստել կենսաքիմիայի և ընդհանուր բժշկության մասնագիտական ոլորտներում հիմնարար տեսական և գործնական գիտելիքներով ու հմտություններով օժտված մասնագետներ, որոնք ունակ են իրականացնելու մասնագիտական գործունեություն կենսաքիմիական, կլինիկական-լաբորատոր, բուժական-ախտորոշիչ, իմունոլոգիական և բժշկագենետիկական ոլորտներում, ինչպես նաև գիտահետազոտական հաստատություններում: Խիստ կարևորվում է ուսուցման գործընթացում ուսանողների կլինիկական մտածելակերպի ձևավորումը բժշկական կենսաքիմիայի գիտելիքների հիման վրա:

Առավելությունները

Ծրագրի շրջանակում դասավանդում են փորձառու դասախոս-հետազոտողներ: Ուսումնառության գործընթացում կիրառվում են տպագիր, էլեկտրոնային, համացանցային, տեսաձայնային ուսումնական ռեսուրսներ (ԵՊՀ գրադարան), կազմակերպվում են հեռուսուցմամբ և առցանց դասախոսություններ, գործնական պարապմունքներն անցկացվում են ժամանակակից սարքավորումներով և ծրագրային միջոցներով ապահովված լաբորատորիաներում։ Ամբիոնի հիմնական դասախոսական կազմը վերապատրաստվել է ԱՄՆ-ի, Գերմանիայի, Ֆրանսիայի, Իսպանիայի, Նորվեգիայի, Բուլղարիայի և Ռուսաստանի առաջատար բուհերում։ 

Ծրագիրն իրականացնում է «Կենսաքիմիայի, մանրէաբանության և կենսատեխնոլոգիայի ամբիոնը»՝ նորաստեղծ «Մանրէաբանական կենսատեխնոլոգիաների և կենսավառելիքի նորարարական կենտրոնի» հետ համատեղ, որոնք համալրված են նորագույն սարքավորումներով, քիմիական ռեակտիվներով և պարագաներով, ինչպես նաև համակարգչային ժամանակակից տեխնիկայով։ 

Կարիերայի հնարավորությունները

Ծրագրի շրջանավարտները կարող են աշխատանքի անցնել գյուղատնտեսության, առողջապահության, սննդի և քիմիական արդյունաբերության, նաև կրթության ոլորտներում, մասնավորապես` բժշկական կլինիկաների կենսաքիմիական լաբորատորիաներում, դեղեր արտադրող գործարաններում, մթերքի կամ ապրանքների որակի ապահովման կամ վերահսկման և կենսաբանական մշտադիտարկման ծառայություններում, փորձագիտական կազմակերպություններում, գիտահետազոտական լաբորատորիաներում որպես գիտաշխատող, թեմայի ղեկավար, լաբորատորիայի ղեկավար, փորձագետ, խորհրդատու և այլն: