Ոսպնյակներից այն կողմ. ուրվագծելով ֆիզիկայի մարդկային դիմանկարը
Պատկերացրե՞լ եք՝ երիտասարդ տարիքում ինչպիսի տեսք կունենային մասնագիտությունները, եթե մարդակերպ լինեին՝ հստակ դիմագծերով, տարբեր բնավորության տեր, մարդու արտաքինն ու վարքագիծն ամբողջացնող որակներով: Եթե ո՛չ, ապա ուսանողական այս պատմությունը առիթ կտա այդ ուղղությամբ խորհելու, ձեր «քայլող ու մտածող» մասնագիտությունը մտքում ճեպանկարելու և նոր տեսանկյունից դիտարկելու համար:
![](/sites/default/files/styles/large_slide/public/2023-07/01_7.jpg?h=979159e9&itok=PFcJm_hr)
Այս համատեքստում ֆիզիկան կերպավորելիս հավանաբար կտեղափոխվեք 16-17-րդ դարեր, երբ որպես գիտաճյուղ այն նոր էր սկսել զարգանալ, բայց… Փոխվում են ժամանակները, և այս մարդ-գիտությունն էլ ձեռք է բերում նոր դեմք ու դիմագիծ:
Ո՛չ, սա տելեպորտացիայի կամ ժամանակի մեքենաների մասին հեքիաթ չէ, այլ իրականություն, որտեղ ԵՊՀ ֆիզիկայի ինստիտուտի ուսանող Հրաչյա Ասատրյանին կտեսնենք որպես «Ֆիզիկա» գիտության մարմնավորում: Հրաչյայի գրանցած հաջողությունները հիմք են դառնում դրանք որպես քրոնիկոն ներկայացնելու, ինչպես նաև անձնավորելու բնության հիմնարար խնդիրներն ուսումնասիրող այս գիտությունը:
Ֆիզիկան իր ինտելեկտն ու մտածողությունը ժառանգել է գենետիկորեն…
Մասնագիտության ընտրությունը Հրաչյայի համար դեռ վաղ տարիքից նախորոշված է եղել. նրա մայրն ու հայրը ԵՊՀ ֆիզիկայի ֆակուլտետի (այժմ՝ ինստիտուտ) շրջանավարտներ են, իսկ պապիկը՝ տեսաբան, ֆիզիկոս, Երևանի ֆիզիկայի ինստիտուտի նախկին տնօրեն Հրաչյա Ասատրյանն է: Ժառանգելով ոչ միայն մեծանուն ֆիզիկոսի անունը, այլև մասնագիտության հանդեպ սերը՝ Հրաչյան ընդունվել է Ա. Շահինյանի անվան ֆիզմաթ դպրոց, գերազանցությամբ ավարտել այն, ապա կրթագիտական ճանապարհորդություն սկսել Երևանի պետական համալսարանի ֆիզիկայի ինստիտուտում:
![](/sites/default/files/styles/large_half_text/public/2023-07/02_6.jpg?itok=KP-Aj_r1)
Ֆիզիկան բնույթով մաքսիմալիստ է, աշխատասեր ու հայրենասեր…
ԵՊՀ ֆիզիկայի ինստիտուտում սովորելիս Հրաչյայի մոտ ձևավորվել է մշտապես առավելագույնի հասնելու ձգտումը: Ասվածի ամենավառ ապացույցը համալսարանական վեց տարիների ընթացքում հանձնած քննությունների գերազանց արդյունքներն են:
Խոսելով համալսարանական ակտիվությունից՝ նա նշում է, որ թեպետ բակալավրիատական տարիներն ընդմիջվել են համավարակով, այնուամենայնիվ վարել է ակտիվ կյանք և հաճախ նախաձեռնել այնպիսի հանդիպում-քննարկումներ, որոնք ունեցել են և՛ իրազեկող, և՛ կրթագիտական նշանակություն:
Անդրադառնալով ոլորտի հանդեպ հետաքրքրության մեծացմանն ուղղված նախաձեռնություններում իր մասնակցությանը՝ Հրաչյան մատնանշում է ֆակուլտետում ՀՀ տարբեր դպրոցների աշակերտների համար կազմակերպված ֆիզիկայի անվճար դասընթացները, որտեղ նա եղել է դասավանդողի դերում:
«Կարծում եմ՝ ֆիզիկային առնչվող տարաբնույթ ծրագրերին իմ մասնակցությունը նաև հայրենիքը շատ սիրելու արդյունք է: Լիահույս եմ, որ ֆիզիկայի զարգացմանն ուղղված ծրագրերը կնպաստեն ոլորտով հետաքրքրվողների թվի մեծացմանը, քանի որ այս բնագավառը խիստ կարևոր և արդիական նշանակություն ունի մեր երկրի զարգացման համար»,- փաստում է Հրաչյան:
Ֆիզիկան 21-րդ դարում ուսապարկով է, որի մեջ համակարգիչն է՝ նախատեսված բարդ կանխատեսումներ կատարելու համար: Նա շարժվում է ստեպ-ստեպ փոփոխվող քայլերով և անմիջականորեն շփվում մաթեմատիկայի, արհեստական բանականության և մասնավորապես մեքենայական ուսուցման հետ:
![](/sites/default/files/styles/large_half_text/public/2023-07/05_4.jpg?itok=ZDyJbDPB)
Բակալավրիատում սովորելու տարիներին Հրաչյան նեղ մասնագիտական գիտելիքներ է ստացել նաև մեքենայական ուսուցման վերաբերյալ, որը ենթադրում է համակարգչային ալգորիթմների ուսումնասիրություն և դիտարկվում է որպես արհեստական բանականության մաս:
Անդրադառնալով ֆիզիկայի և մեքենայական ուսուցման միջև առկա կապերին՝ նա նշում է. «Ֆիզիկան և մեքենայական ուսուցումն ուղղակիորեն կապված չեն, բայց երկուսն էլ համարվում են փորձարարական գիտություններ, որոնց շրջանակում դիտարկվում են ճշմարիտ համարվող տվյալներ, և ստեղծվում մոդելներ, որոնք հնարավորություն են տալիս հետագայում կանխատեսումներ կատարելու»:
Հատկանշական է, որ Հրաչյան, կիրառելով մեքենայական ուսուցմանն ու ֆիզիկային առնչվող գիտելիքները, աշխատում է միջազգային կազմակերպությունում, որի նպատակն է թվային գյուղատնտեսության զարգացումը:
Նա նշում է. «Համալսարանում ստացած գիտելիքները հնարավորություն են տալիս գործնականում օգտագործելու գերժամանակակից տեխնոլոգիաներ և մշակելու արհեստական բանականության ու մեքենայական ուսուցման տարբեր մոդելներ։ Դրանով մենք գյուղատնտեսներին օգնում ենք իրենց աշխատանքը դարձնել առավել կանխատեսելի և արդյունավետ՝ նպաստելով նաև բերքատվության բարձրացմանն ու նրանց եկամտի աճին»։
![](/sites/default/files/styles/large_half_text/public/2023-07/04_5.jpg?itok=Ce4N1-EX)
Մի քանի լեզուների տիրապետող Ֆիզիկան արժանացել է մի շարք կրթամրցանակների ու պատվավոր կոչումների, բայց նրա գլխավոր նպատակը դուրս է մասնագիտական ուղեծրից:
Կրթական ոլորտում ակտիվություն ցուցաբերելուց զատ՝ Հրաչյան հեղինակում է նաև գիտական հոդվածներ: Նա ունի երկու ռուսալեզու և մեկ անգլիալեզու հոդվածներ, որոնք հրապարակված են ազդեցության բարձր գործակից ունեցող ամսագրերում:
«Եթե ձգտում ես ֆիզիկան հասկանալուն, ապա անհրաժեշտ է սովորել մաթեմատիկայի «այբուբենը». միայն դրա շնորհիվ է հնարավոր գիտական ուսումնասիրություններ կատարել: Իսկ երբ նպատակ ես սահմանում այդ ուսումնասիրությունը ներկայացնելու միջազգային գիտական հանրույթին, ապա պետք է գրել միջազգային լեզվով՝ անգլերենով»,- ասում է Հրաչյան:
Հատկանշական է, որ ուսանողական տարիներին դրսևորած ակտիվության համար Հրաչյան արժանացել է «ԵՊՀ ֆիզիկայի ֆակուլտետի լավագույն բակալավր», «Ոսկի սերմեր. հարգանքի և երախտիքի կրթամրցանակներ», «ՏՏ ոլորտում լավագույն ուսանողների ամենամյա կրթական պարգև» կրթամրցանակներին, ինչպես նաև Հայ ֆիզիկոսների միջազգային միության կրթաթոշակին: Վերջերս ճանաչվել է նաև «ԵՊՀ լավագույն ուսանող-2023» մրցույթի հաղթող:
Թեպետ Հրաչյան նպատակ ունի շարունակելու իր գործունեությունը գիտակրթական ոլորտում, այնուամենայնիվ նրա գերնպատակը դուրս է մասնագիտական ոլորտից:
«Նախևառաջ ցանկանում եմ ապագա երեխաներիս համար լինել այնպիսի հայր, ինչպիսին իմն է...»,- ասում է նա: