ԵՊՀ հետազոտողները մասնակցել են Թբիլիսիում կայացած համաժողովին

«CaBol» ծրագրի նպատակն է ստեղծել Կովկասի ցամաքային ու ջրային բոլոր օրգանիզմների՝ բույսերի, կենդանիների, մանրէների հավաքածուներ, ինչպես նաև կենսաբազմազանության կենտրոն, որտեղ կհավաքագրվեն Կովկասի  հարուստ  կենսաբազմազանության նմուշներ:

Հայաստանում հավաքված նմուշների լաբորատոր մշակումը հիմնականում կատարվել է ԵՊՀ կենսաբանության ֆակուլտետի կենդանաբանության ամբիոնի լաբորատորիայում՝ ամբիոնի վարիչ Մարինե Առաքելյանի և ամբիոնի աշխատակիցներ Աստղիկ Ղազարյանի ու Սարգիս Աղայանի ղեկավարությամբ: Ծրագրի շրջանակում ամբիոնի մասնագետներն իրականացրել են դաշտային աշխատանքներ, որոնց ընթացքում Հայաստանի տարբեր մարզերից հավաքագրվել են մեծաքանակ նմուշներ:

Թբիլիսիում անցկացված համաժողովին մասնակցել են Կենդանաբանության ամբիոնի աշխատակիցներ և ուսանողներ, որոնք շնորհանդեսների և պաստառային զեկույցների տեսքով ներկայացրել են ծրագրի շրջանակում իրենց կատարած գիտական աշխատանքներն ու ձեռքբերումները:

«CaBol» ծրագրի շրջանակում նախատեսվում է ամրապնդել գործակցությունը գործընկերների միջև և նախաձեռնել հետազոտական նոր նախագծերի իրականացում կենսաբազմազանության ոլորտում: «CaBol»-ի տվյալների բազան կարևոր հիմք կդառնա Հայաստանի բնության հարուստ կենսաբազմազանության պահպանմանն ուղղված հանրային միջոցառումների իրագործման համար:

Հավելենք, որ ծրագրի շրջանակում կատարված աշխատանքների արդյունքում հավաքված նյութերը հիմք են դարձել թեկնածուական 1, մագիստրոսական 2 և ավարտական 6 աշխատանքների ստեղծման համար։