Հայ և վրաց փորձագետները քննարկեցին երկու երկրների քաղաքական զարգացումները

ԵՊՀ շարունակական կրթության կենտրոնի տնօրեն Լուսինե Խառատյանը նշեց, որ կենտրոնի` «Ազատ ունկնդիր» բաց համալսարան հարթակը հանրության լայն շրջանակների համար որոշակի պարբերականությամբ տարբեր թեմաներով բաց միջոցառումներ է կազմակերպում` դասախոսությունների, հետազոտությունների ներկայացման կամ պանելային քննարկումների ձևաչափերով: 

«Հաշվի առնելով այն, որ վերջին շրջանում Վրաստանում տեղի են ունենում քաղաքական ակտիվ զարգացումներ, մենք հույս ունենք, որ այս քննարկումը նաև համալսարանի պրոֆեսորադասախոսական կազմին և ուսանողներին կօգնի առավել լավ պատկերացում կազմելու Վրաստանում տեղի ունեցող զարգացումների և Վրաստանի հետագա քաղաքական գործընթացների վրա դրանց ազդեցության մասին»,- ասաց Լուսինե Խառատյանը: 

Վրաց փորձագետ Գեորգի Սայշմելաշվիլին անդրադարձավ վերջերս Վրաստանի խորհրդարանի ընդունած «Օտարերկրյա ազդեցության գործակալների մասին» օրենքին։

«Կարծում եմ, որ Վրաստանը պետք է շարունակի ԵՄ-ի հետ ինտեգրացիոն քաղաքականությունը, որը դրական ազդեցություն կունենա նաև Հայաստանի քաղաքական գործընթացների վրա»,- ասաց վրաց փորձագետն ու հավելեց, որ հոկտեմբերին Վրաստանում խորհրդարանական ընտրություններ կանցկացվեն, և հույս հայտնեց, որ նոր կառավարության ձևավորմամբ կվերանայվի ընդունված օրենքը: 

Փորձագետ Արսեն Խառատյանը մեկնաբանեց 2020 թ. պատերազմից հետո գործող իշխանության քայլերը ԵՄ-ի և ՌԴ-ի հետ զարգացումների համատեքստում: 

Քննարկման շրջանակում բանախոսները խոսեցին նաև տարածաշրջանում անվտանգության նոր դերակատարներից:

Նշենք, որ միջոցառումը կազմակերպվել էր ԵՊՀ շարունակական կրթության կենտրոնի, Հելսինկյան քաղաքացիական ազգային կոմիտեի (Հայաստան) և Ազգայնականության ու կոնֆլիկտների հետազոտության ինստիտուտի (Վրաստան) համագործակցությամբ և Ֆրիդրիխ Նաումանի «Հանուն ազատության» հիմնադրամի օժանդակությամբ իրականացվող «Հայաստան-Վրաստան հարևանություն. փորձագետների երկխոսության հարթակ» ծրագրի շրջանակում։ Քննարկմանը հրավիրված փորձագետներից էին նաև Աննա Գևորգյանը, Նժդեհ Հովսեփյանը, Էմիլ Ավդալիանին, Դավիթ Բրագվաձեն, Գեորգի Մասալկինին: Փորձագետների զեկույցներից հետո անցկացվեց ակտիվ քննարկում։