ԵՊՀ ՍԹԵՄ ավագ դպրոցի աշակերտները՝ Կիրառական կենսաբանության միջազգային 4-րդ օլիմպիադայի մեդալակիրներ

Հայաստանի ներկայացուցիչները 2 ոսկե, 5 արծաթե և 1 բրոնզե մեդալ են նվաճել հունիսի 20-23-ը Բալիում (Ինդոնեզիա) անցկացված Կիրառական կենսաբանության միջազգային 4-րդ օլիմպիադայում:

ՀՀ թիմի կազմում ոսկե մեդալներ են նվաճել ԵՊՀ ՍԹԵՄ ավագ դպրոցի 10-րդ դասարանի աշակերտ Մարիամ Գալստյանը և «Քվանտ» վարժարանի 11-րդ դասարանի աշակերտ Արամ Քերոբյանը։ Արծաթե մեդալներ են նվաճել ԵՊՀ ՍԹԵՄ ավագ դպրոցի 10-րդ դասարանի աշակերտ Նանե Անանիկյանը, «Քվանտ» վարժարանի 11-րդ դասարանի աշակերտներ Արա Մելքոնյանը և Հրաչյա Սևոյանը, «Քվանտ» վարժարանի 9-րդ դասարանի աշակերտ Անի Գևորգյանը, Կոտայքի մարզի Հրազդանի №10 ավագ դպրոցի 10-րդ դասարանի աշակերտ Էլեն Դանիելյանը: Բրոնզե մեդալ է նվաճել «Քվանտ» վարժարանի 10-րդ դասարանի աշակերտ Հայկ Հարությունյանը։ 

Մասնակիցները նախօրոք առցանց ձևաչափով մասնակցել և հաղթահարել են նախնական երկու փուլերը և հնարավորություն ստացել մասնակցելու եզրափակիչ փուլին:

Հատկանշական է, որ Հայաստանի 3 կրթօջախները եզրափակիչ փուլում ներկայացնող բոլոր 8 աշակերտներն արժանացել են մեդալների։

Նշենք, որ Կիրառական կենսաբանության միջազգային օլիմպիադայի մրցանակակիրները, համաձայն ՀՀ Կառավարության N 597-Ն որոշման, բուհ են ընդունվում առանց ընդունելության քննությունների։