Բարձրագույն կրթության որակի գործունեության առանցքային ցուցանիշների զարգացումը՝ քննարկման թեմա․ աշխատաժողով Ջենովայի համալսարանում

KPI4HE-ի առանցքային դրույթներից է բուհերի ինստիտուցիոնալ վարչակազմի, որոշումներ կայացնողների, դասավանդողների և հետազոտողների կարողությունների զարգացումը՝ ԳԱՑԱՇ-ի կայուն զարգացման նպատակներին համապատասխան՝ որպես բարձրագույն կրթության կառավարման և որակի ապահովման գործիք:

Միջազգային համագործակցության վարչության դրամաշնորհների համակարգման բաժնի վարիչ, KPI4HE նախագծի համակարգող Արսեն Ապրոյանը նշեց, որ Ջենովայի համալսարանում քննարկվել են ծրագրի ռազմավարությունը, գործողությունների անցկացման ժամանակացույցը, ծրագրի իրազեկմանն ու լուսաբանմանն ուղղված միջոցառումները. «Աշխատաժողովին ներկայացվեցին ԳԱՑԱՇ-ի զարգացման վերաբերյալ եվրոպական փորձառու բուհերի օրինակներ, փորձի փոխանակման արդիականությունը և աջակցության կարիքը։ Ջենովայի համալսարանում քննարկվեցին նաև ինստիտուցիոնալ հետազոտությունների համար կարողությունների զարգացման, ռազմավարական պլանավորման, նոր ընթացակարգերի ու գործիքների մշակման ու ներդրման, որակի ապահովման, կատարողականի արդյունավետության ցուցիչների վերաբերյալ հարցեր։ 

KPI4HE ծրագրի շրջանակում նախագծում ներառված գործընկերների աշխատանքային խմբերի կողմից կմշակվի ԳԱՑ-երի վերաբերյալ օրինակելի ուղեցույց, ԳԱՑԱՇ-ի մշակման համար կկազմակերպվի երկօրյա աշխատաժողով ԵՊՀ-ում, ինչպես նաև կանցկացվեն առցանց հանդիպումներ ու քննարկումներ գործընկեր բուհերի ներկայացուցիչների հետ»։

Արսեն Ապրոյանն ընդգծեց, որ մշակվել է «Հայաստանի Հանրապետության բարձրագույն կրթության գործունեության առանցքային ցուցանիշների ազգային շրջանակի հայեցակարգ»-ը, որտեղ ներկայացված են ոլորտի խնդիրները, առաջարկվող լուծումները և ակնկալվող ազդեցությունը. «Հայեցակարգի իրագործման արդյունքում ակնկալվում է ՀՀ բարձրագույն կրթության համակարգի բարելավում, հաշվետվողականության և թափանցիկության ապահովում, միջազգային կրթական չափանիշներին համապատասխանեցում, ՀՀ բուհերի պետական ֆինանսավորման համակարգի բարելավում, բուհերի հավատարմագրման արդյունավետության բարձրացում և որակի համակողմանի վերահսկողության ապահովում»։

Հայեցակարգի մշակմանը մասնակցել են ՀՀ ԿԳՄՍՆ բարձրագույն կրթության և գիտության կոմիտեն, ԵՊՀ-ն, ՀՀ ԳԱԱ ինֆորմատիկայի և ավտոմատացման պրոբլեմների ինստիտուտը, Խաչատուր Աբովյանի անվան հայկական պետական մանկավարժական համալսարանը, Եվրասիա միջազգային համալսարանը, Հյուսիսային համալսարանը, Գավառի պետական համալսարանը, Մասնագիտական կրթության որակի ապահովման ազգային կենտրոնն ու «Կրթության քաղաքականության և կառավարման հայկական կենտրոն» ՀԿ-ն: 

Հայեցակարգի իրագործման խորհրդատու մարմիններն են Օլդենբուրգի համալսարանը (Գերմանիա), Դրեզդենի տեխնիկական համալսարանը (Գերմանիա) և Ջենովայի համալսարանը (Իտալիա):

Նշենք, որ Ջենովայի համալսարանում կազմակերպված աշխատաժողովին մասնակցել են ԵՊՀ ռեկտոր Հ. Հովհաննիսյանը, գիտական հարցերի գծով պրոռեկտոր Ռաֆայել Բարխուդարյանը, Միջազգային համագործակցության վարչության պետ, նախագծի համակարգող Ալեքսանդր Մարգարովը, ՄՀՎ դրամաշնորհների համակարգման բաժնի վարիչ Արսեն Ապրոյանը, ռեկտորի խորհրդական Վիգեն Խալատյանը, Տեղեկատվական համակարգերի բաժնի վարիչ Նատալյա Դանիելյանը և Ռազմավարական պլանավորման կենտրոնի աշխատակից Արմինե Ղալամդարյանը։