Սոցիալական համերաշխությունը՝ ԵՊՀ և արտերկրի գիտնականներին միավորող թեմա

Գիտաժողովի շրջանակում հայաստանյան և արտասահմանյան հետազոտողներն ու գիտնականները քննարկում են սոցիալական համախմբվածության, հավաքական ինքնության և քաղաքացիական ներգրավվածության դերը պետական հաստատությունների ամրապնդման, ազգային միասնության խթանման և կայուն զարգացման ապահովման գործում։ Գիտաժողովի նպատակն է համախմբել գիտնականներին, քաղաքականություն մշակողներին և քաղաքացիական հասարակության ներկայացուցիչներին՝ քննարկելու սոցիալական վստահության բարձրացման, հասարակական բաժանարար գծերի նվազեցման և ընդգրկուն կառավարման խթանման ռազմավարությունները՝ որպես ամուր և համախմբված պետության հիմնասյուներ։

Գիտաժողովին տարբեր երկրներից մասնակցում են մի շարք հեղինակավոր փորձագետներ, այդ թվում՝ Նորվեգիայի Ստավանգերի համալսարանի սոցիալական ուսումնասիրությունների ֆակուլտետի դոցենտ, ԵՊՀ-ի երկարամյա գործընկեր Բրիտա Գիերշտադը, Շվեյցարիայի Բեռնի կիրառական գիտությունների համալսարանի պրոֆեսոր, Երեխաների, երիտասարդության և ընտանիքի ուսումնասիրությունների ինստիտուտի տնօրեն Էմանուելա Չիպարինին, «Աստրա» հիմնադրամի առողջության, պաշտպանության և բռնության կանխարգելման հարցերով գործադիր տնօրեն, ս.գ.թ. Վերոնիկա Օդինոկովան։

Գիտաժողովի ընթացքում մասնակիցները քննարկում են արդիական այնպիսի թեմաներ, ինչպիսիք են «Համերաշխություն և սոցիալական համակարգ», «Համերաշխություն՝ արցախյան ճգնաժամից հետո», «Սոցիալական աշխատողի դերը հասարակության համերաշխության ապահովման գործում», «Համերաշխությունը փոփոխությունների ժամանակ»։ 

ԵՊՀ կիրառական սոցիոլոգիայի գիտահետազոտական լաբորատորիայի հետազոտական գործունեությանն է նվիրված գիտաժողովի առանձին մասնախումբ, որտեղ գիտաշխատողները քննարկում են «Քաղաքը՝ որպես ապաստան. Արցախից Երևան տեղահանվածները ներառման և բացառման միջև», «Ճգնաժամը ՀՀ փոքր քաղաքներում», «Գերիշխանության ճգնաժամը Հայաստանում. վերլուծական օպերացիոնալիզացիայի փորձ», «Համալսարանական կարիերայի կենտրոնները Հայաստանում և Վրաստանում. հետխորհրդային զարգացման համեմատական վերլուծություն» թեմաները:

Գիտաժողովի կազմակերպիչներից ԵՊՀ սոցիալական աշխատանքի և սոցիալական տեխնոլոգիաների ամբիոնի վարիչ Յուլիանա Մելքումյանը, կարևորելով գիտաժողովի նշանակությունը, ընդգծեց. «Այս ամենամյա գիտաժողովը բացառիկ հարթակ է սոցիալական քաղաքականության, գիտության և գործնական ոլորտների ներկայացուցիչների համար՝ քննարկելու և մշակելու հայեցակարգային մոտեցումներ և ռազմավարություններ, որոնք կարող են նպաստել ավելի ուժեղ և միասնական հասարակության ձևավորմանը»։