«ՌԱԶՄԱՎԱՐԱԿԱՆ ՀԱՂՈՐԴԱԿՑՈՒԹՅԱՆ ԴՊՐՈՑ». ԵՊՀ-ՈՒՄ ԻՐԱԿԱՆԱՑՎԵԼՈՒ Է ՎԵՐԱՊԱՏՐԱՍՏՄԱՆ ՆՈՐ ԾՐԱԳԻՐ

ԵՊՀ ռեկտոր Հովհաննես Հովհաննիսյանի, ՄՀԻ հայաստանյան մասնաճյուղի տնօրեն Ջեյմս դե Ուիթի և ՀԿՏԿ տնօրեն Գոռ Ծառուկյանի միջև ստորագրված եռակողմ հուշագրի նպատակն է պետական տեղեկատվական քաղաքականության ոլորտում համատեղ մշակել ու իրականացնել պետական գերատեսչությունների անձնակազմի մասնագիտական կարողությունների զարգացմանն ուղղված վերապատրաստման ծրագրեր։

Կողմերը պայմանավորվածություն ձեռք բերեցին համատեղ իրագործելու գիտական և կրթական ծրագրեր, տրամադրելու մասնագիտական-փորձագիտական աջակցություն ու խորհրդատվություն, անցկացնել վերապատրաստման դպրոցներ, ֆորումներ, գիտաժողովներ ու ակադեմիական այլ միջոցառումներ՝ ԵՊՀ, ՀԿՏԿ և ՄՀԻ անձնակազմի, պետական գերատեսչությունների ներկայացուցիչների, ուսանողների, երիտասարդ հետազոտողների, տարբեր ոլորտների առաջատար մասնագետների, գիտնականների, միջազգային մասնագետների ներգրավմամբ։

Այսօր ամրագրված պայմանավորվածությունների համաձայն՝ կողմերի ներկայացուցիչներից ձևավորված աշխատանքային խումբն իրագործելու է «Ռազմավարական հաղորդակցության դպրոց» մասնագիտական վերապատրաստման ծրագիրը, որը մշակել է ՄՀԻ-ն ԱՄՆ ՄԶԳ «Հայաստանում ընտրական գործընթացների և քաղաքական հաշվետվողականության ամրապնդում» ծրագրի շրջանակում։

Կողմերը հույս հայտնեցին, որ համագործակցությունը կնպաստի տարբեր ծրագրերի իրագործման արդյունավետությանը, հատկապես տարբեր գերատեսչությունների միջև հաղորդակցության ամրապնդմանն ու ինստիտուցիոնալացմանը։