ՎԱՐՊԵՏՈՒԹՅԱՆ ԴԱՍ ԵՊՀ-ՈՒՄ. ՈՒՍԱՆՈՂՆԵՐԻՆ ՆԵՐԿԱՅԱՑՎԵՑԻՆ ՀԱՐՑԱԶՐՈՒՅՑԻՆ ՊԱՏՐԱՍՏՎԵԼՈՒ ԵՎ ՆԵՐԿԱՅԱՆԱԼՈՒ ՆՐԲՈՒԹՅՈՒՆՆԵՐԸ

ԵՊՀ կառավարման և գործարարության ամբիոնի վարիչի տեղակալ, դոցենտ Աննա Հակոբջանյանը մեզ հետ զրույցում ասաց, որ նմանաբնույթ վարպետության դասերը տարբեր կազմակերպությունների ներկայացուցիչների հետ շարունակական բնույթ են կրելու:   

Նրա խոսքով, վարպետության դասի նպատակն է ուսանողներին ծանոթացնել անձնակազմի հետ աշխատանքի նրբություններին, անձնակազմի զարգացման ռազմավարությունների մշակման առանձնահատկություններին և կազմակերպությունում առաջնորդության դրսևորումներին, ինչպես նաև ճիշտ անձնակազմ ընտրելու մեխանիզմներին:

«Մարդկային ռեսուրսների կառավարում և առաջնորդություն›› թեմայով վարպետության դաս վարեց ‹‹ՎիվաՍել-ՄՏՍ›› կազմակերպության Մարդկային ռեսուրսների պլանավորման և զարգացման բաժնի պետ Մարիանա Էդիլյանը:  

Նա ուսանողներին առաջին հերթին բացատրեց՝ ինչպես պետք է կազմել ռեզյումեն և CV-ին, ներկայացրեց դրանց տարբերությունները: Ծանոթացրեց հարցազրույցին պատրաստվելու և ներկայանալու նրբություններին, իսկ եթե արդեն ընդունվել են աշխատանքի, ապա ինչպես ընտելանալ ընկերության աշխատաոճին:

Մեզ հետ զրույցում Մարիանա Էդիլյանը նշեց, որ նմանօրինակ հանդիպումները կօգնեն ուսանողներին աշխատաշուկայում ճիշտ կողմնորոշվել: «Կարծում եմ, որ այսօրինակ հանդիպումները կօգնեն ուսանողներին, որպեսզի նրանք դառնան ավելի մրցունակ: Քանի որ այսօր ուսանողների մեծ մասը գալիս է հարցազրույցի՝ չիմանալով, թե ինչպես ներկայացնել մասնագիտական հմտությունները և աշխատանքային փորձը: Նմանատիպ հանդիպումները ճիշտ կլիներ ունենային շարունակական բնույթ, քանի որ դասախոսության ընթացքում ուսանողներին տրվում են գործնական գիտելիքներ»,-ասաց նա:   

Հանդիպման վերջում Մարիանա Էդիլյանը պատասխանեց ուսանողներին հետաքրքրող մի շարք հարցերին:

Նադեժդա Տեր-Աբրահամյան