ԿԵՆՍԱԲԱՆՈՒԹՅԱՆ ՖԱԿՈՒԼՏԵՏԻ 28 ՈՒՍԱՆՈՂ ԿՍՏԱՆԱ ՄԱՆԿԱՎԱՐԺԻ ՈՐԱԿԱՎՈՐՈՒՄ

Մեկ շաբաթ ուսանողները դպրոցներում լսելու են, թե ինչպես են ուսուցիչները մատուցում դասը, իսկ հետագա երեք շաբաթվա ընթացքում հենց իրենք են անցկացնելու դասը:

Դեկանի տեղակալի խոսքով, քանի որ մանկավարժական պրակտիկան արդեն անցկացվում է կամավորության սկզբունքով, մանկավարժի որակավորում ստանալու համար մանկավարժական պրակտիկային մասնակցելու ցանկություն է հայտնել 28 ուսանող:

Այս ուսանողները ևս 4 շաբաթ մանկավարժական պրակտիկա են անցնելու են չորրորդ կուրսում:

Կ. Ղազարյանի խոսքով, նախկինում մանկավարժական պրակտիկային պարտադիր սկզբունքով մասնակցում էին Կենսաբանության ֆակուլտետի 4-րդ կուրսի բոլոր ուսանողները:

ԵՊՀ-ի բակալավրիատի շրջանավարտներին մանկավարժի որակավորում շնորհելու կանոնակարգում կատարվել է փոփոխություն, որի համաձայն՝ 2016 թ. դեկտեմբերից սկսած ԵՊՀ-ում կիրարկվում է «240 կրեդիտ + 30 կրեդիտ» համակարգը, այսինքն՝ մանկավարժի որակավորում ստացող ուսանողների համար նախատեսվում է 30 կրեդիտ ծավալով մանկավարժական լրացուցիչ կրթաբլոկ:

Մանկավարժի որակավորում ստանալու համար կազմակերպվող դասընթացներին ուսանողները մասնակցում են կամավորության սկզբունքով՝ ՀՀ ԿԳ նախարարության հետ համաձայնեցված մասնագիտությունների ցանկի հիման վրա:

Նշենք, որ բակալավրիատի շրջանավարտներին մանկավարժի որակավորման շնորհումը իրականացվում է ՀՀ ԿԳ նախարարի 2015 թ. հուլիսի 3-ի 647-Ա/Ք հրամանով հաստատված ՀՀ բարձրագույն մասնագիտական կրթության մասնագիտությունների կրթական ծրագրերի համաձայն, իսկ ուսուցումը կազմակերպվում է «Կրեդիտային համակարգով ուսումնական գործընթացի կազմակերպման օրինակելի կարգի» պահանջներին համապատասխան:

«Այն ուսանողները, որոնք ցանկանում են Կենսաբանության ֆակուլտետն ավարտելուց հետո ունենալ նաև մանկավարժի որակավորում, նրանք իրենց դիմումի համաձայն երկրորդ կուրսից անցնում են 30 կրեդիտ ծավալով մանկավարժական կրթաբլոկի համար նախատեսված լրացուցիչ առարկաներ»,- հավելեց Կ. Ղազարյանը:

Այս տարի այն 28 ուսանողները, որոնք մասնակցելու են մանկավարժական պրակտիկային, այն համատեղելու են բուհում անցկացվող դասընթացների հետ: Իսկ նախկինում մանկավարժական պրակտիկային մասնակցող ուսանողներն ազատվում էին դասերից:

Ըստ բանախոսի՝ ֆակուլտետի շրջանավարտները, ունենալով մանկավարժի որակավորում, աշխատաշուկայում իրենց տեղն ավելի հեշտ կգտնեն, քանի որ այսօր դպրոցներում որակյալ մանկավարժների կարիք շատ կա: «Հույս ունենք, որ տարեցտարի մանկավարժի որակավորում ստանալու ցանկություն ավելի շատ ուսանողներ կունենան»,-  ասաց Կ. Ղազարյանը:

Նադեժդա Տեր-Աբրահամյան