ԲԱՆԱԿՑԵԼՈՒ ԱՐՎԵՍՏԸ. ՍՏԵՓԱՆ ՍԱՖԱՐՅԱՆԸ ԴԱՍԱԽՈՍՈՒԹՅՈՒՆ ԿԱՐԴԱՑ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏՈՒՄ

Միջազգային հարաբերությունների ֆակուլտետի փոխդեկան Ժակ Մանուկյանի խոսքով, բանակցային գործընթացների վերաբերյալ դասախոսություն լսելու նախաձեռնությունը հենց ուսանողներինն էր:

Ստեփան Սաֆարյանը, ողջունելով ներկաներին, ներկայացրեց բանակցություններ վարելու հմտությունների կարևորությունը:



Ինտերակտիվ ձևաչափով դասախոսության ընթացքում ուսանողները սահմանեցին բանակցություն հասկացությունը, բերեցին իրենց կյանքում առկա բանակցային գործընթացների օրինակներ:

Սահմանազատելով բանավեճն ու բանակցությունը՝ ուսանողները նշեցին, որ ի տարբերություն առաջինի՝ բանակցությունը միտված է համաձայնություն ձեռք բերելուն:
Ուսանողներն իրենց կարծիքը հայտնեցին Լեռնային Ղարաբաղի շուրջ բանակցությունների վերաբերյալ:



Ստեփան Սաֆարյանը, ներկայացնելով բանակցությունների տեսակները, նշեց գործարար և կոնֆլիկտային բանակցությունների տարբերությունները: Նա անդրադարձավ բանակցությունների երկարաժամկետ ազդեցություններին:

Բանակցությունների հնարավոր ելքերը՝ հաղթանակ-հաղթանակ, հաղթանակ- պարտություն, պարտություն-պարտություն, ոչ-ոքի: Առաջինի դեպքում բավարարվում են երկու կողմերի բոլոր պահանջները:



Պարտություն-պարտություն ելքը տապալված բանակցություններն են:

Ոչ-ոքի տարբերակը երկու կողմերի պարագայում էլ բավարարում է որոշակի պահանջները:



Ստեփան Սաֆարյանն անդրադարձավ նաև դիրքային բանակցություններին՝ նշելով դրանց առանձնահատկությունները և թերությունները, որոնցից են մյուս կողմի շահերի անտեսումը և կողմերի հարաբերությունների վտանգումը:

Բանախոսն ուսանողների հետ քննարկեց բանակցային ռազմավարությունների տեսակները, բանակցությունների ակնկալիքները և այլն:

Մարի Ռաֆյան