ԳԻՏԱԿԱՆ ԶԵԿՈՒՑՈՒՄ ՔԻՄԻԱՅԻ ՖԱԿՈՒԼՏԵՏՈՒՄ. ՄԻՔԱՅԵԼ ԱԶՆԱՈՒՐՅԱՆԸ ՆԵՐԿԱՅԱՑՐԵՑ ԻՐ ՀԵՏԱԶՈՏՈՒԹՅԱՆ ՎԵՐՋԻՆ ԱՐԴՅՈՒՆՔՆԵՐԸ

Միքայել Ազնաուրյանը զբաղվում է կենսաբանական համակարգերի ֆիզիկական քիմիայով: Ինչպես հանդիպման սկզբում ներկայացրեց ԵՊՀ ֆիզիկական և կոլոիդների քիմիայի ամբիոնի վարիչ Շիրազ Մարգարյանը, Մ. Ազնաուրյանը ճանաչված գիտնական է, ունի մեծ թվով հրապարակումներ, զեկուցումներով հանդես է եկել բազմաթիվ գիտաժողովներում, իսկ այսօր էլ գիտական խմբի ղեկավար է:

«Միքայել Ազնաուրյանն ուրախությամբ պատրաստ է համագործակցել մեր ֆակուլտետի հետ, աջակցել շնորհալի ուսանողներին, ինչպես նաև միջազգային ծրագրերի շրջանակում նրանց ընդունել հետազոտական իր խումբ: Բացի դրանից՝ նա ցանկություն ունի պարբերաբար այցելել և դասախոսություններ կարդալ մեր ուսանողների համար»,- ասաց Շիրազ Մարգարյանը:

«Սպիտակուցների և նուկլեինաթթուների կառուցվածքային դինամիկայի միկրոսկոպիկ հետազոտությունները մոլեկուլային մակարդակի վրա` լուծույթներում և կենդանի բջիջներում» թեմայով զեկուցման ժամանակ հանդիպման բանախոսը լսարանին ներկայացրեց իրենց հետազոտության վերջին արդյունքները՝ անդրադառնալով նաև կիրառված մեթոդներին: 

Զեկուցման ավարտին Միքայել Ազնաուրյանը պատասխանեց ներկաների հարցերին:

Քնար Միսակյան