ՀԱՄԱԼՍԱՐԱՆԱԿԱՆՆԵՐԻՆ ՆԵՐԿԱՅԱՑՎԵՑ ՀԵՌԱՆԿԱՐԱՅԻՆ ԼՈՒԾՈՒՄՆԵՐԻ ԿԵՆՏՐՈՆԻ ՆՈՐ ԾՐԱԳԻՐԸ

Հայաստանի գիտության և տեխնոլոգիաների հիմնադրամի հաղորդակցության և  սոցիալական մեդիայի մասնագետ Արմինե Պետրոսյանը մեզ հետ զրույցում նշեց, որ Հեռանկարային լուծումների կենտրոնը, որը ստեղծվել է «FAST»-ի նախաձեռնությամբ, հիմնադրվել է որպես գիտահեն կազմակերպությունների ստեղծման և զարգացման բազմաֆունկցիոնալ հարթակ:

Հայաստանի գիտության և տեխնոլոգիաների հիմնադրամի ավագ վերլուծաբան Հովակիմ Զաքարյանն ասաց, որ ծրագրի նոր փուլը ներառելու է կենսագիտության ոլորտը՝ մասնավորապես մոլեկուլային կենսաբանություն, մանրէաբանություն, կենսաքիմիա, կենսատեխնոլոգիա, հաշվողական կենսաբանություն, դեղագիտություն և բժշկական կենսաբանություն:

Հ. Զաքարյանի խոսքով, Հեռանկարային լուծումների կենտրոնում առկա են թափուր աշխատատեղեր ավագ հետազոտողի և հետազոտողի համար, որոնք կատարելու են մեծածավալ հետազոտություններ կենսագիտության ոլորտում և ստեղծելու են նորարարական լուծումներ առևտրայնացվող գաղափարների մշակման համար:

Ընտրված հայտատուներն այս տարվա հունիսից միանալու են «FAST»-ի համահիմնադիր Նուբար Աֆեյանի կողմից  ստեղծված «Ֆլեգշիփ Փիոնիրինգի» թիմին և 24 շաբաթյա ուսումնական ծրագրի շրջանակում վերապատրաստվելու են Բոստոնում գտնվող «Ֆլեգշիփ Փիոնիրինգի» գրասենյակում:

Նշենք, որ փաստաթղթերը ներկայացնելուց հետո սկսվելու է ընտրության փուլը.  սկզբնական շրջանում ներկայացվելու են պահանջվող բոլոր փաստաթղթերը, այնուհետև հիմնադրամի աշխատակիցները նախնական ուսումնասիրություն են իրականացնում, որից հետո ընտրված փաստաթղթերն ուղարկվում են մասնագիտական հանձնաժողովին, որն էլ իր հերթին կուսումնասիրի և ընտրված մասնակիցներին կհրավիրի հարցազրույցի: Հարցազրույցից կարճ ժամանակ հետո կտրվի պատասխան:

Այնուհետև Արմինե Պետրոսյանը ներկայացրեց «FAST» հիմնադրամի գործունեությունը, դրա նպատակները, սկզբունքները, խոսեց իրականացվող աշխատանքների և հիմնադրամի գործընկերների մասին:

Ա. Պետրոսյանը նաև խոսեց հիմնադրամի կրթաթոշակային ծրագրերի մանրամասների մասին: Նա նշեց, որ ծրագրի նպատակն է աջակցել ազգությամբ հայ կամ ՀՀ քաղաքացի հանդիսացող տաղանդավոր այն ասպիրանտներին և ուսանողներին, որոնք  ցանկություն ունեն Հայաստանի առաջատար բուհերում բնական գիտությունների, տեղեկատվական տեխնոլոգիաների, ճարտարագիտության և մաթեմատիկայի (STEM) բնագավառներում իրականացնելու գիտությունների թեկնածուի աստիճանի ձեռքբերմանն ուղղված հետազոտություններ:

Նշենք, որ հանդիպման ընթացքում հիմնադրամի ներկայացուցիչները պատասխանեցին ներկաների հարցերին:

Տեղեկացնենք նաև, որ հիմնադրամի կրթաթոշակային ծրագրին առավել մանրամասն ծանոթանալու և դիմելու համար կարող եք այցելել հիմնադրամի պաշտոնական կայք կամ անցնել հետևյալ հղմամբ:

Նադեժդա Տեր-Աբրահամյան